भांगरभूंय | प्रतिनिधी
सुभाष शिरोडकारः मडगांवां जाली क्षयरोगा विशीं कार्यावळ
भांगरभूंय । डीआयपी
पणजीः गोंय राज्याक सक्षम आनी निरोगी करचे खातीर आमी शिक्षणीक आनी भलायकी मळा वयले उदरगती कडेन लक्ष केंद्रीत करपाची गरज आसा. राज्य सगळें बाबतींत सक्षम आनी निरोगी आसपाक जाय, अशें उदकास्त्रोत मंत्री सुभाष शिरोडकार हांणी सांगलें.
17 ऑगस्टाक मडगांवच्या रवीन्द्र भवनांत गोंय सरकारान स्थापन केल्ल्या होमियोपथी मंडळान भलायकी सेवा संचालनलायच्या राष्ट्रीय क्षयरोग निर्मुलन कार्यावळीच्या आदारान क्षयरोगा वयलें निरंतर वैजकी शिक्षण कार्यावळ आयोजीत केल्ली. ह्या वेळार मंत्री शिरोडकार उलयताले.
आझादी का अमृत महोत्सवा निमतान देशभर आयोजीत केल्ल्यो कार्यावळी मनांत जाग्यो दवरून आमी स्वातंत्र्याच्या 100 व्या वर्सा कडेन वाटचाल करुया. ‘हर घर तिरंगा’चो उलो मारून प्रधानमंत्र्यानी दूरदर्शीपणा दाखोवपाचें काम केलां, अशेंय मंत्री शिरोडकार हांणी सांगलें.
गोवा बोर्ड ऑफ होमिओपॅथीचे अध्यक्ष बिपीन साळकार हांचेंय ह्या वेळार भाशण जालें. दक्षीण गोंय जिल्हो हॉस्पिटलाचे डॉ राजेंद्र देसाय, सहयोगी प्राध्यापक डॉ. लिंगराज मकदूम हांणी क्षयरोग दुयेंस आनी उपायां विशीं म्हायती दिली. उपाध्यक्ष डॉ. एडगर मिनेझिस ह्या वेळार हाजीर आशिल्ले. रजिस्टार डॉ. राजेंद्र काणेकार हांणी येवकार दिलो. डॉ. मर्लिन तेलीस हांणी उपकार मानले. डॉ. प्रतिष्ठा कुंकळ्ळीकर हांणी सुत्रसंचालन केलें.
‘उत्कृश्ट भलायकी सेवा दिवपाक सरकार बांदील’
भारत हो एक विशाल देश आसा आनी ह्या देशांत साबार दुयेंसां, म्हामारी आसात आनी येवन गेल्यो, पूण लोक आनी वैजकी मळा वयल्या तज्ञांच्या आदारान आमी तांचेर जैत जोडलां. गोंयांतल्यान क्षयरोगाचेंय निर्मुलन जालां. क्षयरोगाक पयस दवरपा खातीर होमिओपॅथी, एलोपॅथी आनी हेर सगळ्या वैजकी मळांचेर काम जावपाक जाय. राज्य सरकार गोंयकारांक बऱ्यातल्यो बऱ्यों भलायकी सेवा दिवपाक बांदील आसा. आमी आळस पयस करून निरोगी जीण जगपाक जाय, अशें मंत्री सुभाष शिरोडकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
