भांगरभूंय | प्रतिनिधी
आंदोलन सुरूच दवरपाचो चिंबल ग्रामस्थांचो निश्चेव
पणजी : युनिटी मॉल प्रकल्प रद्द करपाची सरकाराची तयारी ना. मात लोकांक नाका जाल्यार प्रशासन स्तंब प्रकल्प रद्द करपाची सरकाराची तयारी आसा. युनिटी मॉल हो केंद्राचो प्रकल्प. ताचेर आतां मेरेन २५ कोटी रूपया खर्च जाल्यात, अशें सरकारान वतीन सांगलें. मुख्यमंत्र्यां वांगडा जाल्ले चर्चे विशीं आमी समाधानी नात, अशें चिंबल जैवविविधताय मंडळ समितीचे अध्यक्ष गोविंद शिरोडकार हांणी सांगलें.
युनिटी मॉलाआड आमचें आंदोलन चालूच उरतले. फुडली दिशा ग्रामस्थां कडेन चर्चा करून थारतली, अशेंय तांणी सांगलें.
युनिटी मॉला आड चिंबल ग्रामस्थांचें २८ डिसेंबर सावन आंदोलन चालू आसा. जाहीर सभा घेवपा सयत तांणी १५ जानेवारीक विधानभवनाचेर मोर्चा लेगीत व्हेलो. मोर्चाचे राती कडेन बसून चर्चा करपाचें आस्वासन मुख्यमंत्री डॉ. प्रमोद सावंत हांणी दिल्लें. हें प्रमाण आयज बुधवारा आंदोलकांच्या शिश्टमंडळा कडेन डॉ. सावंत हांची बसका जाली. उपरांत गोविंद शिरोडकार हांणी ही म्हायती दिली.
तळ्याचेर जावपी परिणामा विशीं नव्यान अभ्यास
युनिटी मॉल प्रकल्प तोयार तळ्याच्या प्रभाव क्षेत्रा सावन (झोन ऑफ इन्फ्लूएन्स) पयस आसा, अशें सरकार म्हणटा. तांचो हो दावो चुकीचो आशिल्ल्याचें शिश्टमंडळान ह्या वेळार पटोवन दिलें. आतां एनआयओ, उदका पुरवण खातें तोयार तळ्याचे प्रभाव क्षेत्र आनी युनिटी मॉल प्रकल्पा सावन जावपी परिणामा विशीं नव्यान अभ्यास करतलें. शुक्रारा मेजमाप जातलें. नव्यान अभ्यास करपाक ग्रामस्थांची कसलीच हरकत ना, अशें गोविंद शिरोडकार हांणी सांगलें.
युनिटी मॉलाच्या परवान्या विशीं प्रधान सत्र आनी जिल्लो न्यायालयान जो आदेश दिला, ताका मात सरकार आव्हान दिवचें ना, हें स्पश्ट जालां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
