भांगरभूंय | प्रतिनिधी
पणजीः प्रधानमंत्री मत्स्य संपदा येवजणे खाला गोंयच्या सत्तरी तालुक्यांतल्या केरी हांगा आधुनीक मत्स्यालय स्थापन करपाचो प्रस्ताव राज्य सरकारान तयार केला. ताचो सविस्तर प्रकल्प अहवाल (डीपीआर) तयार करून नुस्तेमारी खात्याक सादर केला अशीं म्हायती नुस्तेमारी मंत्री निळकंठ हळर्णकार हांणी दिली.
ह्या प्रस्तावीत मत्स्यालयांत वेगवेगळ्या जातींच्या नुस्त्यांक पळोवपाची सुविधा आसतली. गोंयांतल्या पर्यटनाक चालना दिवपा खातीर हो एक म्हत्वाचो प्रकल्प मानतात. ह्या प्रकल्पा खातीर जलसंपदा विभागा कडल्यान सुमार 8 हजार चौखण मिटर जमीन नुस्तेमारी खात्यान संपादीत केल्या. तयार केल्लो प्रकल्प अहवाल केंद्र आनी राज्य सरकारांक मान्यताये खातीर धाडटले. केंद्र सरकाराच्या 60 टक्के आनी गोंय सरकाराच्या 40 टक्के निधींतल्यान हो प्रकल्प चालीक लावपाची येवजण आसा.
मिरामाराच्या जाग्यार आतां केरींत प्रकल्प
हाचे आदीं मिरामारांत हें मत्स्यालय स्थापन करपाचो प्रस्ताव आशिल्लो; पूण उपरांत तें रद्द जालें. आतां हो प्रकल्प सत्तरीच्या केरी गांवांत स्थापन जातलो अशी म्हायती सूत्रांनी दिल्या. केरी-सत्तरी वाठारांक नवे पर्यटन केंद्र म्हूण उदरगत करपाचो विचार राज्य सरकार करता. पूण अजून ह्या प्रकल्पा खातीर निमाणी मान्यताय मेळूंक ना.
प्रधानमंत्री येवजणेचो लाव घेवन हो प्रकल्प चालीक लावपा खातीर खात्याचें यत्न सुरू आसात. हाचे वांगडाच नुस्तेमारीचेर आदारिल्लें संग्रहालय आनी म्हायती केंद्र स्थापन करपाचो प्रस्तावय विचारांत आसा.
गावगिऱ्या पर्यटनाक चालना
हो प्रकल्प साकार जालो जाल्यार सत्तरींतल्या गांवगिऱ्या पर्यटनाची व्हड उदरगत जावपाची शक्यताय आसा. केरी-सत्तरी वाठार पांचवोचार सैमीक सोबीतकायेन नटलां. हांगाच्या नामनेच्या आजोबा देवस्थानाचें सोबीतकाय करपाचे काम सध्या चालू आसा आनी ते काम निमाण्या पांवड्यार पावलां. केरी सावन चोर्ला वचपी बेळगांव मार्ग खास करून पावसाच्या दिसांनी पर्यटकांक आकर्शीत करता. अशा वातावरणांत मत्स्यालय स्थापन केल्यार ह्या वाठारांतल्या पर्यटन उदरगतीक नवी उर्बा मेळटली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
