भांगरभूंय | प्रतिनिधी
पेडणेंः पेडण्यां सरकारी इमारतींत काल स्लॅबाचो कुडको कोसळून कनिश्ट लिपिक सुजय गावडे जखमी जालो. हेर स्लॅबय कोसळपाची शक्यताय आसा. इमारतींतलें पुराय कार्यालय सरकारान दुसरे सुवातेर स्थलांतरीत करपाची गरज आसा. आठ दिसां भितर इमारत दुरुस्त करूंक ना वा बाल कल्याण खात्याचें कार्यालय स्थलांतरीत करूंक ना जाल्यार निशेध करपा बगर दुसरो पर्याय ना. मांद्रेंचे आदले सरपंच आनी सध्याचे पंच बाळा उर्फ प्रशांत नायक हांणी पत्रकारां कडेन उलयतना हे विशीं शिटकावणी दिली.
ही इमारत 1990 वर्सा बांदिल्ली. पूण भौशीक बांदकाम खात्याच्या इमारत खात्यान दुरुस्ती संबंदी ताचे कडेन दुर्लक्ष केलें. हे इमारतीचे कांय भाग कोसळटा. उपजिल्होधिकारी म्हणटात, कांय म्हयन्यां पयलीं बांदकाम खात्याक कळयिल्लें. मात तांणी सरळ आडनदर केली. अभियंते म्हणटात, ‘फायलीचेर प्रक्रिया चालू आसा.’ दुरुस्ती खातीर टेंडर काडले. पूण फुडली प्रक्रिया अजून पुराय जावंक ना. हाचो परिणाम काल स्लॅब कोसळून एकलो जखमी जालो. अशीं घडणूक परतून घडली आनी तांतूत जिवितहानी जाल्यार जापसालदार कोण? असो प्रस्न बाळा उर्फ प्रशांत नायक हांणी केलो. मांद्रेंचे आदले सरपंच प्रशांत नायक आनी कांय नागरिकांनी कर्मचाऱ्यांक धा दिसां भितर दुसरे कडेन व्हरचे, नाजाल्यार धरणें आंदोलन करतले, अशी शिटकावणी दिल्या.
पत्रकारां कडेन उलयतना, सरकारान हे इमारतींतलीं सगळीं कार्यालयां बेगीनांत बेगीन स्थलांतरीत करून कर्मचाऱ्यांक सुरक्षा दिवची अशी मागणी केली. सरकारान फावो ती कारवाय केली ना जाल्यार आठ दिसांनी आमी आंदोलन करतले अशी शिटकावणीय तांणी दिल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
