भांगरभूंय | प्रतिनिधी
म्हारगाय आनी भ्रश्टाचाराचो लागींचो संबंद आसा. कारण उंचेले जिणेशैली खातीर भरपूर पयसो जाय पडटा.
सामान्य भौसाक कल्पनाय करपाक जावचेंना तें गोंयांत घडपाक लागलां. देड- दोन कोटींक बंगलो मेळटा, हें कानार पडटा थंय आसा, आतां एके आंतरराष्ट्रीय पावणी संस्थेन मयड्यां स बेडरुमांचो आलिशान बंगलो 105 कोटी रुपयां परस चड मोलाक विकपाक दवरला, अशी खबर मेळ्ळ्या. गोंयच्या खेडेगांवांनीय 7- 8 कोटींची मालमत्ता घेवपी कुटुंबां आसात खंय, पूण 105 कोटी ही रक्कम खूब जाली. ‘गिरेस्त मनीस तो बंगलो घेतलो, आमकां कित्याक पडलां?’, अशें म्हणून फाफडून उडोवपाची ही गजाल न्हय. कारण तिचो समाजीक, सैमीक, अर्थीक परिणाम भोगचो पडुये. सरकारी यंत्रणांचें आतांच हाचेर नियंत्रण जाय. शंकरान दिल्लो वर तपासपाक भस्मासूर दिसता ताचे तकलेर हात दवरपाक धांवतालो, तशे आयज दिसता ती जमीन विकपाक, विकत घेवपाक वसवशिल्ले लोक धांवतात. सूज्ञांक चड सांगपाक नाका!!
गोंयांत सेकंड होमाची संकल्पना 1970 च्या दसकांत रुजली. अर्थांत सिनेमा कलाकार, व्हडले उद्देजक घरां घेताले. मात जागतिकीकरणा उपरांत सगलेच म्हारगीं घरां, फ्लॅट घेवपाक लागले. जायत्या कलाकार, खेळगड्यांचे हांगा बंगले आसात. पयलीं दर्यादेगे वयल्या आसगांव, शिवोले सारक्या गांवांक मागणी आशिल्ली. आयज, आडवाटे वयल्या गांवांनी पसून घरां, जमनीक भांगराचें मोल आयलां. आतां शेतां, दोंगर, मिठागरांचेरूय घरां, क्लब, फार्म हावसां उबीं जाल्यांत; जायत आसात. सरकारी यंत्रणांक हडफडेंचो धग बसतकच जाग आयली आनी तपासणे उपरांत बरींच आस्थापनां बेकायदेशीर आशिल्ल्याचें दिसून आयलें. बिल्डरांनी आवाज करिनासतना तीं उबारल्यांत काय आवाज करप्यांचीं तोंडां पाचव्या कागदांनी बंद करून तीं बांदल्यांत, तें जाचें- ताणें थारावचें. ह्यो जमनी विकपाच्यो बेकायदेशीर गजाली काँग्रेस काळांतूच जाल्यात, अशीय एक दंतकथा हालींच एका बाबान सांगल्या. घडये ती खरीय आसत!!
फाटले 2011 चे लोकमेजणे प्रमाण, गोंयांतलीं 25 टक्के घरां खंय रिकामी आसात. म्हणल्यार तांचे धनी विदेशांत. आतां तींच घरां पयशेकारांनी विकत घेतल्यांत काय नवीं, ताचो अभ्यास करचो पडटलो. गोंयकारांक सादो फ्लॅट विकत घेवप परवडना जालां. थोड्यांनी अतिक्रमणां केल्यांत. हातूंत अर्थांत भायले बस्तीकारूय आसात!! म्हारगाय आनी भ्रश्टाचाराचो लागींचो संबंद आसा. कारण उंचेले जिणेशैली खातीर भरपूर पयसो जाय पडटा. ताका लागून संद मेळटा ते लोक भ्रश्टाचार, गैरप्रकार, गैरकारभार करपाक लागल्यात. थोडे वाडवडलांच्यो जमनी, मालमत्ता विकपाक लागल्यात. हाका लागून गोंयची वळख बदल्ल्या. आंगण, पोरसूं, बांय, घरा मुखार झाडां….. सगलें ना जालां. हवामानूय लहरी जालां. कोयर, येरादारीची समस्या हिस्पा भायर वाडल्या. उदकाची पातळी देंवल्या. हाचे मुखार ल्हानशें घर बांदप वा घेवप पसून सामान्य गोंयकाराक घामाघूम करतलें.
गोंय संवसाराक आकर्शीत करता, पूण गोंयकारांक तें परवडटा काय? व्हिला, बंगल्यांक लागून अर्थवेवस्था फुगता, मात समाजाचीं मुळां सैल जातात. जंय घर घेवप शक्य जायना, थंय कालांतरान जगपूय अशक्य जाता. मागीर विकास उरता, फक्त आंकड्यां खातीर, मनशां खातीर न्हय. उदरगत जाय, पूण मनशाक केंद्रस्थानार दवरून, नाजाल्यार गोंय फक्त डेस्टिनेशन म्हूण उरतलें, घर म्हूण न्हय! दुडू मोडप्यांक लागून स्वराज्य संस्थांक उत्पन्न मेळटा, गोंयाक संवसारीक पांवड्यार वळख मेळटा. पूण हाचे फायदे सामान्य भौसाक मेळटाच अशें नात. गोंयांत देश, विदेशांतल्यान जावपी खरेदी बाबतींत पारदर्शकताय जाय. स्वराज्य संस्थांक विकास थारावपाचे अधिकार दिवंक जाय. सामान्यां खातीर परवडपी दरांत घरां बांदूंक जाय….
असले अब्जांचे बंगले खपपाक लागले काय तांचो आंकडो वाडत वतलो आनी ताचो जमनीच्या मोलाचेरूच न्हय, तर सगल्यांचेरूच परिणाम जातलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
