भांगरभूंय | प्रतिनिधी
पणजी: युनिटी मॉल प्रकल्पा विशीं मुख्यमंत्री डॉ. प्रमोद सावंत आंदोलकांच्या शिश्टमंडळा कडेन फाल्यां बुधवारा चर्चा करतले. बुधवारा सकाळीं 11.30 वरांचेर आल्तिन्य बंगल्यार चर्चा करपा खातीरचो वेळ निश्चीत जाला अशी म्हायती जैवविविधताय मंडळ समितीचे अध्यक्ष गोविंद शिरोडकार हांणी दिली. युनिटी मॉल विरोधांत चिंबल ग्रामस्थांचें सोमारा 23व्या दिसा आंदोलन सुरूच आशिल्लें.
युनिटी मॉला आड चिंबल ग्रामस्थांनी 28 डिसेंबराक आंदोलन सुरू केल्लें. हाचे उपरांत तांची चिंबला सभा जाली. हे सभेक विरोधी पक्षाचे फुडारी तशेंच पर्यावरण वाठारांतल्या कार्यकर्त्यांनी तेंको दिल्लो. विधानसभा अधिवेशना वेळार लेगीत विरोधी आमदारांनी हो प्रस्न मांडून हौदांत बसका मांडली. बिरेस्तारा आंदोलकांनी मोर्चा काडून मेरशी जंक्शनाचेर ठाण मांडलें. बिरेस्तारा रातीं कडेन मुख्यमंत्री डॉ. प्रमोद सावंत हांणी आंदोलकांची भेट घेवन आंदोलन फाटीं घेवपाचें आवाहन केलें. हाचे उपरांत ग्रामस्थांचें पयलीं भशेन आंदोलन कदंब पठाराचेर सुरू जालें.
युनिटी मॉल हो केंद्राचो प्रकल्प आशिल्ल्यान राज्य सरकार निर्णय घेवंक शकना. केंद्राची मान्यताय घेवची पडटली अशें सांगून मुख्यमंत्र्यांनी आंदोलकांची समजूत घाली. मुख्यमंत्री दिल्लींत आसात. दिल्लींतल्यान आयले उपरांत बुधवारा चर्चा जातली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
