भांगरभूंय | प्रतिनिधी
आगोंदकारांची मागणी : ‘सीआरझॅडएम’च्या पत्राचेर आगोंदा खास ग्रामसभा
भांगरभूंय । प्रतिनिधी
काणकोण : गोंय दर्यादेग वाठार वेवस्थापनान (सीआरझॅडएम) आगोंद पंचायतीक एक पत्र धाडून आगोंद दर्यादेग वाठारा विशीं म्हायती मागयल्या. आठ दिसां भितर अहवाल धाडून दिवचो, अशें तातूंत म्हणलां. ते संबंदांत सोमारा पंचायतीन ह्या पत्रां संबंदांत चर्चा करपा खातीर खास ग्रामसभा आपयिल्ली.
हे ग्रामसभेंत गोंय दर्यादेग वाठार वेवस्थापनान धाडिल्ल्या पत्राचेर चर्चा केली. आठ दिसांत पंचायत पुराय अहवाल धाडपाक शकना, तेन्ना अहवाल धाडून दिवपाक आनीक कांय दिसांची मुजतवाड दिवची, अशी मागणी करतले, अशें सरपंच निलेश पागी हांणी लोकांक म्हायती दितना सांगलें.
गोंय दर्यादेग वाठार वेवस्थापनाच्या अधिकाऱ्यांनी आगोंद पंचायत कार्यालयांत येवन धाडिल्ल्या पत्रा विशीं खोलायेन म्हायती दिवची, जे वरवीं दर्यादेग वाठारांत रावपी लोकांक, पर्यटन वेवसाय करप्यांक आनी कांसव संवर्धन केंद्राक लेगीत त्रास जावचो ना, असो थाराव सोमारचे खास ग्रामसभेंत घेतलो, अशें सरपंच पागी हांणी सांगलें. गोंय दर्यादेग वाठार वेवस्थापनान धाडिल्ल्या पत्रांत खूबशे उणाव आसात. फुडारांत त्यो थळावे लोक, पर्यटन वेवसायिकांक, नुस्तेकार भावांक त्रासाचे थारतले. हाचेर योग्य उपाय काडपाक सरकारान पावलां उखलचीं, अशी मागणी क्लिफर्ड फर्नांडीस आनी टीपू पागी हांणी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
