भांगरभूंय | प्रतिनिधी
पणजी : गोंयांत भाजयेचे लागवडीच्या वाठारांत वाड जाल्या, पूण पिकावळींत उणाव नोंद जाला. पावासाळी पीक बरें जाल्ले, पूण वायंगणी हंगामांत पिकावळींत उणाव नोंद जालो. फाटल्या दोन वर्सांच्या काळांत लागवडीच्या वाठारांत 165 हॅक्टरांनी वाड दिसून आयल्या, पूण भाजयेची पिकावळींत 3655 टन इतलो उणाव नोंद जाला. 2025 त खरीप हंगामांत लागवड आनी पिकावळी दोनूय उणीं आसात. जाल्यार वायंगण शेती अजून सुरू आसा, अशी आंकडेवारी शेतकी खात्यान जारी केल्या.
2023 ते 2025 मेरेन कारलीं, भेंडे, कोंकण दुदी, वांयगीं, मिरसांग, चिटकी, कोथमीर, तवशीं, दुदी, मुळो, तांबडी भाजी, घोसाळीं, मको, वाल, पालक, मेथी, शेपू, पडवळ, नाभ (नर्कल, गड्डे), चिबूड, वालपापडी हे सारकिल्ला 2.58 लाख टन इतले भाजयेचें उत्पन्न गोंयच्या शेतकारांनी घेतलां. पूण 2023 चे तुळेंत 2024 त लागवडीच्या वाठारांत वाड जाल्या खरी, पूण उत्पादनांत उणाव जाला.
2023 त 8698 हॅक्टर जमनींत भाजयेची लागवड जाल्ली आनी 2024 त हे लागवडींत 8863 हॅक्टर मेरेन वाड जाली. 2023 त 1.14 लाख टन इतली भाजयेची पिकावळ तयार जाली, जाल्यार 2024 त भाजयेची पिकावळ 1.10 लाख टन मेरेन उणी जाली. सध्या 2025 वर्साचो खरीप हंगाम सोंपला. 2024 चे खरीप हंगामाचे तुळेंत 2025 त लागवडीच्या मळार 221 हॅक्टर इतलो उणाव नोंद जाला तशेंच पिकावळींत 4021 टन इतलो उणाव नोंद जाला. वांयगण शेती अजून चालू आसात. जाल्यार 2023 चे तुळेंत 2024 त खरीप पिकाचे लागवडींत 61 हॅक्टर आनी पिकावळींत 3807 टन वाड नोंद जाल्या. वायंगण पिकाचे लागवडींत 113 टन वाड नोंद जाली खरी, पूण पिकावळींत 7,462 टन उणाव नोंद जालो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
