सीझेडएमपी फाल्यांच अधिसुचीत जाता म्हूण बोवाळ

भांगरभूंय | प्रतिनिधी

आक्षेप, सुचोवण्यो मांडपाक फावो तितलो दितले वेळः पर्यावरण संचालक

भांगरभूंय । प्रतिनिधी
पणजीः सीझेडएमपी 2019 हो नवो सुदारीत आराखडो फाल्यां सावन सुरू जाता असो समज जावन कोफुसांव जालें. 20 जानेवारी म्हणल्यार फाल्यां हो आक्षेप आनी सुचोवणी दिवपाची निमाणी तारखी अशी नोटीस काय पंचायतींक आयल्या. देखून लोकां मदी संभ्रम निर्माण जाला, अशें पर्यावरण मोगी अभिजित प्रभुदेसाय हांणी सांगलें. मजगतीं, सीझेडएमपी 2019 अजून जाहीर जावंक ना. हो जाहीर जातकत भौशिक सुनावणी आपोवन लोकांक आपले म्हणणे मांडपा खातीर फावो तितलो वेळ मेळटलो, अशें स्पश्टीकरण पर्यावरण संचालक सचिन देसाय हांणी सांगलें.
ह्या कोफुसांव विशीं स्पश्टीकरण मागपाक पिळर्ण सिटीझन फोरम आनी वेळ्ळीचे आमदार क्रुझ सिल्वा हांणी पर्यावरण संचालक सचिन देसाय हांची भेट घेतली.
सीझेडएपमी 2011 तयार करपाक सगल्या पंचायतींनी, लोकांनी भायर सरून मँपींग तयार करून सुचोवण्यो मांडिल्ल्यो आनी 6 नोव्हेंबर 2022त सीझेडएमपी 2011 अधिसुचीत जालो. पूण ह्या आराखड्यांत भरपूर चुको आसात आनी लोकांनी सांगलें तशें जावंक ना, अशें प्रभुदेसाय हांणी सांगलें. पूण 14 जानेवारीक काय पंचायतींनी नोटीस धाडून सीझेडएमपी 2019 तयार जाला अशें सांगून ताचेर सुचोवणी दिवपाक फकत एक दिस म्हणल्यार 20 जानेवारी 2026 ही निमणी तारीख आसतली अशें सांगलें. पूण चडश्या पंचायतींक ही नोटीस येवंक ना. हो सीझेडएमपी आमच्या माथ्यार मारपाक सोदता कांय असो लोकांक हुसको जाला, अशें प्रभुदेसाय हांणी सांगलें.
संचालकान हे विशीं लोकांचो सल्लो घेवपा खातीर सारखो वेळ दितले अशें तोंडी आश्वासन दिलां. पूण हे विशीं कांयच लेखी ना. तुमचो गांव राखपाक, दर्यादेगो राखपाक जाय जाल्यार सीझेडएमपी 2019 विशीं आतांच अभ्यास करचो. हे विशींचे आराखडे ऑनलायन आसात आनी ज्यो त्रुटी आसात त्यो आतांच सुदारून घेवपाक जाय. जर हो फाल्यां अधिसुचित जालो कांय हो कायदो अंमलात येतलो आनी न्यायालय ह्या मसुद्याचेरुच निर्णय घेतले, अशी म्हायती प्रभुदेसाय हांणी दिली.
साळ न्हंयेंचेर कितलेशेच वर्सा लोक आपली पोटा चलयतात. ते न्हंयेंचे मॅपींग करप, खंय नुस्ते मारप, खंय बोटी लावप हे विशींचो सुचोवण्यो आमका दिवपाक जाय. पूण आतां अचकीत सीझेडएमपी 2019 खातीरच्या सुचोवण्या खातीर स दिसाचो दिल्लो वेळ कमी आसा. आमकां दोन म्हयने तरी जाय, अशें वेळ्ळींचे आमदार क्रुझ सिल्वा हांणी सांगलें.
संचालकान सांगलां, तरी घुस्पागोंदळ जाला. ही नोटीस पंचायतींत वच्ची सोडून फक्त गट उदरगत अधिकाऱ्यांच्या कचेरेंत वचपाची आसली. आतां बीडीओ पांवड्या वेल्यान फुडलो प्रकिया जशें की मॅपींग, अभ्यास प्रक्रियेक सुरवात जातली. तांणी तोंडान वेळ दिता म्हूण सांगला पूण परिपत्रक काडून कितलो वेळ मेळटलो हे स्पश्ट करपाची मागणी सिल्वा हांणी संचालकांकडे केली. हे विशीं घुस्पागोंदळ जाला आनी सीझेडएमपी अधिसुचोवणी प्रमाण जी काळरेखा आसा तिका पाळो दिवन सुचोवण्यो आनी आक्षेप मांडपाक फावो तितलो वेळ मेळटलो, अशें स्पश्टीकरण पर्यावरण संचालक सचिन देसाय हांणी दिले.
दोन दिसां भितर अधिसुचोवणी येतली हो गैरसमज जालां. हे विशींची कळोवणी दिसाळ्यांचेर उजावडाक हाडटले. उपरांत हे विशीं म्हणणे मांडपा खातीर सीआरझेड अधिसुचोवणी प्रमाण 30 ते 60 दिसाचो कालावधी आक्षेप आनी सुचोवण्यो मांडपा खातीर दितले, अशे देसाय हांणी सांगलें.