भांगरभूंय | प्रतिनिधी
पणजीः साळगांवच्या ग्रँड मरड वाठारांत रेंट- अ- बायक वेवसायांतल्यान अर्थीक वाद जाल्ल्यान रस्त्यार बापूय आनी पुताचेर जिवेघेणो हल्लो करपाची घडणूक उजवाडाक आयल्या.
मंजीत महेश नायक आनी ताचो बापूय महेश नायक हांकां बडयले आनी दुबावितांनी तांकां जिवे मारपाची धमकी दिली. ही पुराय घडणूक वाठारांतल्या सीसीटीव्ही कॅमेऱ्यांत कैद जाल्या. साळगांव पुलिसांनी गुन्यांव नोंद करून चवकशी सुरू केल्या.
मेळिल्ले म्हायती प्रमाण आयतारा सांजवेळार हॉटेल अल्डिया सिएस्टा लागसार ही घडणूक घडली. रेंट- अ- बायक वेवसायांतल्या वेव्हाराक लागून मंजीत नायक आनी दुबावितां मदीं वाद जालो. वाद वाडून व्हडली झगडीं जालीं आनी दुबावितांच्या पंगडान मंजीत आनी ताच्या बापायक मारपेट केली.
नायक कुटुंबान रोखडीच साळगांव पुलिशेंत कागाळ केली आनी संरक्षण दिवपाची मागणी केली. घडणुकेची गंभीरताय जाणून घेवन साळगांव पुलिसांनी वाठारांतले सीसीटीव्ही फुटेज ताब्यात घेतले आनी दुबावितांची वळख पटोवपाचे काम सुरु केलां.
मजगतीं, पर्यटन वेवसाया संबंदीत वाद निर्माण जावपाची ही पयलीच खेपेची गजाल न्हय. 29 डिसेंबराचे रातीं घडिल्ले घडणुकेंत रेंट- अ- बायक वेवसायिकां मदीं जाल्ल्या वादांत एकल्यान दुसऱ्याच्या कानाक चाबिल्लो. उपरांत जखमी नितेश कांदोळकार हांचेर जीएमसींत उपचार केल्लें.
उपरांत म्हापशें पुलिसांनी ह्या प्रकरणांत समीर पेडणेकार ह्या दुबाविताक अटक केल्ली. अशा घडणुकांक लागून थळाव्या नागरिकांनी तिडक उक्तायलां आनी पुलिसांनी खर कारवाय करपाची मागणी केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
