भांगरभूंय | प्रतिनिधी
माद्रिद, खबरां संस्थाः स्पेनांतल्या कॉर्डोबा प्रांतांत आयतारा रातीं एक ट्रेन ट्रॅका वयल्यान निसरुन दुसरे ट्रेनीक आपटली. ह्या अपघातांत 21 जाणांक मरण आयलां. 73 प्रवासी जखमी जाल्यात. एपीच्या म्हणण्या प्रमाण दोनूय ट्रेनीन मेळून सुमार 500 प्रवासी आशिल्ले. खबरां प्रमाण मलागा सावन माद्रिद वचपी ट्रेन ट्रॅका वयल्यान निसरुन लागसारच्या लायनीचेर गेली आनी थंय माद्रिद-हुएलवा मार्गाचेर चलपी एव्हीई ट्रेनीक आपटली.
थळावे भलायकी मंत्री अँटोनियो सँज हांणी सांगलें, मरण आयिल्ल्यांचो आंकडो वाडपाची शक्यताय आसा. मजत आनी बचाव कार्य चालू आसा आनी जखमींक स वेगवेगळ्या हॉस्पिटलांत दाखल केल्यात अशें तांणी सांगलें.
सँजच्या म्हणण्या प्रमाण ह्या अपघातांत एक डबो चार मीटर खोल देंगणांत पडलो. कॉर्डोबाच्या उजो पालोवपी दळाचे मुखेली फ्रान्सिस्को कार्मोना हांणी स्पेनाच्या राष्ट्रीय रेडिओ आरएनई कडेन उलयतना सांगलें, एका ट्रेनीचें व्हड लुकसाण जालां आनी उण्यांत उणे चार डबे ट्रॅका वयल्यान निसरलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
