भांगरभूंय | प्रतिनिधी
मडगांव : शारी भागांतल्या जमीन सर्वेक्षणांत दवर्ली दिकरपाल पंचायतीचो आस्पाव केला. 10 वर्सां आदींय असो यत्न जाल्लो. ताका लोकांनी विरोध केलो आनी आतांय पंचायत वाठारांतल्या भू सर्वेक्षणाक दवर्ली दिकरपालच्या लोकांनी ग्रामसभेंत विरोध केलो.
दवर्ली दिकरपाल पंचायतीची विशेश ग्रामसभा पंचायतीच्या सभाघरांत आयतारा सकाळीं जाली. सरपंच मिनीन कुलासो हांणी सांगलें, सेटलमेंट अॅण्ड लँड रेकॉर्ड संचालनालया वतीन नोटीस जारी केल्ली तशेंच पंचायतीक ताची एक प्रत धाडल्या. ते प्रमाण मडगांव शार हांचे वांगडा आके, दवर्ली, नावेली, नुवें, सुरावली, राय ह्या भागांचोय आस्पाव जमनींच्या सर्वेक्षणांत केला. हातूंत घरां आनी हेर मालमत्तेची मेजणी करतले. हे विशीं लोकांक कळोवपा खातीर ही खासा ग्रामसभा आयोजीत केल्ली अशें तांणी म्हणलें.
पंचायतीचे हक्क काडून घेवपाचे यत्न सरकार करता. गरजेची परवानगी दिवपाचे अधिकार फक्त सचिवांक दिवन कायदो दुरुस्ती केल्या. आतां पंचायत क्षेत्राचो पालिका क्षेत्रांत आस्पाव केल्यार हाचो सगल्या लोकांचेर परिणाम जातलो. पंच वांगड्यांच्या जाग्यार नगरसेवक येतले आनी कामां खातीर पालिकेंत पासयो मारच्यो पडटल्यो. तशेंच एफएसआर वाडयल्यार शेतजमनी उरच्यो नात आनी गांवाची पुरायेन वाट लागतली, अशें मत अँड्र्यू हांणी उक्तायलें. लोकांनी ह्या सर्वेक्षणाक विरोध केले उपरांत ग्रामसभेंतूय तसो थाराव घेतलो.
मात, हे ग्रामसभेच्या पयलीं पंच वांगड्यांची बसका जावंक नाशिल्ली. हाका लागून 24 जानेवारीक पंचांची बसका घेतले आनी उपरांत परत 8 फेब्रुवारीक खासा ग्रामसभेचें आयोजन करूत परत भू सर्वेक्षणाक विरोधाचो थाराव घेवपाचें थारलें, अशें सरपंच मिनीन कुलासो हांणी सांगलें. हे खासा ग्रामसभेक पांच पंच वांगडी हाजीर रावूंक ना. हाचेरूय कांय लोकांनी आक्षेप घेतलो. गांवच्या अस्तित्वाचो प्रस्न आसतना पंच गैरहाजीर रावप हें योग्य न्हय. फुडले ग्रामसभेक तांकां हाजीर रावपाक सांगचें, अशी तांणी मागणी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
