भांगरभूंय | प्रतिनिधी
लोटलेचे ग्रामसभेंत विरोध थळाव्या लोकांचो विरोध
भांगरभूंय । प्रतिनिधी
मडगांव : गुंतवणूक उर्बा मंडळान लोटले क्रिकेट अकादमी प्रकल्पा खातीर नोटीस काडल्या. हाका लोटली ग्रामसभेंत हरकत घेवन ह्या प्रकल्पाक विरोधाचो थाराव घेतलो आनी ह्या प्रकल्पाचेर परतून विचार करपाची मागणी केली. ते भायर आमदारांक मेळपाचें आनी गरज पडल्यार न्यायालयांत वचपाचो लेगीत निर्णय घेतलो.
लोटली पंचायतीची विशेश ग्रामसबा आयतारा पंचायतीच्या सभाघरांत आयोजीत केल्ली. तातूंत वेर्णेँच्या क्रिकेट अकादमी प्रकल्पा खातीर 25 हजार चौखण मिटर जमीन दिवपा संबंदांतली नोटीस गुंतवणूक उर्बा मंडळा कडल्यान 7 जानेवारीक दिसाळ्यांनी जारी केल्ली. हाचेर हरकती मागयल्यात.
जंय आतां क्रिकेट मैदान आसा, थंय बांदकामा खातीर 2023 त पंचायती कडल्यान परवानो घेतला, नगरनियोजनाची परवानगी घेतल्या. रुपांतरण सनद नाशिल्ल्यान काम चालू करपाक मेळचें ना, अशी अट आशिल्ली. पूण मैदान बांदून उक्तावण लेगीत केलां.
ह्या प्रकल्पांतल्यान 950 रोजगार निर्मिती आनी साडेसतरा कोटींचो महसूल मेळटलो हाचेर ह्या प्रकल्पाक मंजुरी दिल्या, हें चुकीचें आसा. ते भायर पठाराचेर बोअरवेल मारतात. जानेवारी मेरेन गांवांत उदकाचो उणाव निर्माण जाता. गांवांतले जमनीचो वापर गांवा खातीर जावचो, प्रकल्पांचो गांवाचेर जावपी परिणाम समजून घेवपाची गरज आसा, अशें फ्रँकी मोंतेरो हांणी सांगलें. आयपीबीच्या क्रिकेट अकादमी प्रकल्पाचे नोटिशे प्रमाण प्रकल्पाक हरकत घेतले. तशी मागणी ग्रामसबेंत लोकांनी केल्या, अशें सरपंच रायलॉन फर्नांडीस हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
