भांगरभूंय | प्रतिनिधी
रमेश तवडकार : आदिवासी संघटणेक 3 कोटी दिवपाची घोशणा
भांगरभूंय । प्रतिनिधी
केपें : संघटणा चलोवपाक ध्येयवादी लोक जाय. ते आसल्यारूच संघटणा योग्य दिशेन वाटचाल करता. आपूण फाटलीं 25 वर्सां सावन समाज वावर करता, आदिवासी समाज फुडें वचपाक जाय, हे खातीर वावुरता. कोण खंय जल्माक येता हें म्हत्वाचें ना, तो जल्माक येवन कितें करता, हें म्हत्वाचें आसा. समाज भावांचो अर्थीक, शिक्षणीक हेर मळांचेर उदरगत जातली आनी फुडें वतले, हे नदरेन सगल्यांनी वावर करपाक जाय, अशें आदिवासी मंत्री रमेश तवडकार हांणी सांगलें.
केपें आदिवासी संघटणेच्या 14 व्या आदिवासी महोत्सवांत मुखेल सोयरे म्हूण मंत्री तवडकार उलयताले. ह्या वेळार कुडचडेंचे आमदार निलेश काब्राल, दक्षीण गोंय जिल्हो पंचायत अध्यक्ष सिद्धार्थ गांवस देसाय, फा. कालिस्टो, सरपंच जोसेफ वाझ, रिमेडियो रिबेलो, आदले उपनगराध्यक्ष कॅमिलो सिमॉयश आनी हेर मानेस्त हाजीर आशिल्ले.
स्वताची जमीन घेवन थंय समाजा खातीर सभाघर आनी हेर कामां करपाची आदिवासी संघटणेचो हांवेस आसा. ही बरी गजाल. हे खातीर संघटणेन आदीं जमीन घेवची. फुडल्या उदरगतीच्या कामा खातीर आदिवासी येवजणे खाला 3 कोटी रुपया दितले, अशें तवडकार हांणी सांगलें. खूब वर्सां आपूण संघटणेचे कार्यावळीक येता. आदिवासी संघटणा बरें काम करता. संघटणेच्या वावरांत सगल्या वांगड्यांनी वांटो घेवचो. तेचवरी नवी पिळगेन लेगीत संघटणेंत येवचें. संघटणा स्वताची जमीन घेतली, तांची इत्सा पुराय जावंदी, अशें आमदार निलेश काब्राल हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
