भांगरभूंय | प्रतिनिधी
नामनेचे ‘कोरियन बॉय बॅण्ड बँग्टन बॉयज’ म्हणल्यार बीटीएस, संवसारांतलें सगळ्यांत फामाद म्युझिकल बॅण्डांतलें एक. रॅपर्स आनी गायक मेळूक ह्या बॅण्डांत वट्ट सात कलाकार आसात, जांची नामनां फकत दक्षीण कोरिया मेरेन मर्यादीत ना. भारतांत लेगीत बीटीएसाचें खूब चाहते आसात.
फाटल्या कांय वर्सांनी बीटीएसाची नामनां पुराय संवसारांत वाडल्या. बटर, फेक लव, फायर आनी बॉय वीथ द लव हे सारकिल्ल्या आल्बमांनी बीटीएसाचे लोकप्रियतेंत अदीक भर घातल्या. चार वर्सां सावन बीटीएस आर्मी ताच्या नव्या आल्बमाची वाट पळयताले. आतां निमाणे कडेन बीटीएसान नव्या वर्सा एक व्हड घोशणा केल्या. ताका लागून फकत भारतीयूच न्हय जाल्यार संवसारभरांतले चाहते खोशी जातले.
बीटीएसाचे वांगडी चार वर्सां उपरांत आपल्या नव्या म्युझीक आल्बमा वांगडा परतूय येवपाची तयार करतात. एके अधिकृत घोशणेंत बॅण्ड एजन्सी ‘बीग हीट म्युधीक’ हाणें ते येवपाचे आसात ती तारीख जाहीर केल्या. म्युझीक आल्बमाटें नांव जाहीर करूंक नासलें तरीय तो केन्ना येतलो, हें स्पश्ट जालां. संवसारभरांत चार वर्सां उपरांत बीटीएस वांगडी 20 मार्चाक आपल्या नव्या म्युझीक आल्बमा वरवीं बोवाळ निर्माण करतले.
भारतांत बीटीएसाचे खूब चाहते आसात, पूण बीटीएसाची एकूय कार्यावळ अजून मेरेन भारतांत जावंक ना. 2026 त तांच्या चाहत्यांक तांची कार्यावळ भारतांत पळोवपाची संद मेळूं येता.
फाटल्या चार वर्सां सावन बीटीएसचे वांगडी एकठांय संगिता पसून पयस आशिल्ले, ताचें कारण सगळे आपापली मिलिटरी सर्वीस पुराय करताले. पॉप स्टार्स आरएम, जीन, सुगा, जे- होप, जिमीन, वी आनी जुंगकूक हांणी ह्या चार वर्सांनी एकूय आल्बमांत काम करूंक नासतलें, पूण ते वैयक्तीक प्रॉजेक्टाचेर काम करताले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
