भांगरभूंय | प्रतिनिधी
नवें वर्स आसूं वा हेर कसलोय व्हड सुवाळो, लोक चडशे सुटयो मनोवपाक वतात. ह्या वेळार ते आपले खातीर हॉटेल लेगीत बूक करतात, पूण कांय लोक हाचे परस कसलेय वेगळे सुवातेर रावपाक सोदतात. हे खातीर आयज- काल संवसारभरांत वेगवेगळे प्रायोगीक रिसॉर्ट लेगीत तयार करपाक लागल्यात. एकादे सुवातेर एकादो ट्री हावस बांदता, जाल्यार आनीक खंय जमनी पसून शेंकड्यांनी फूट वयर वयर मळबांत रेस्टॉरंण्टांत जेवपाची संद दिता. अशेंच एक हॉटेल आसा, जें व्हड जंबो जेटा पसून तयार केलां.
स्विडनाची राजधानी स्टॉकहोमाच्या अरलॅण्डा विमानतळाचेर हें आगळें दृश्य पळोवपाक मेळटा. थंय धांवपट्टीचे लागसार एक पोरणें बोईंग 747- 200 जेटलायनर उबें आसा, जें आतां उडना, मात संवसारभरांतल्या पर्यटकांक आलाशिरो दिता. सांगपाचें म्हणल्यार 2008 त आपलें निमाणें उड्डाण मारले उपरांत ह्या विमानाक कावलाक काडचे बदला एक सोबीत आनी सवाय ‘जंबो हॉटेलां’त रुपांतरीत केलें. आयज संवसारांतलें सगळ्यांत चर्चेंत आशिल्लें आनी आगळ्या हॉटेलांतलें एक हॉटेल थारलां.
ह्या विमानाक हॉटेल करचे खातीर ताका काँक्रीटाचे एके बुन्यादीचेर उबें केलां. ताच्या लॅण्डींग गियराक स्टीलाच्या क्रेडलांत सुरक्षीत केलां, कारण तें एके सुवातेर स्थीर उरचें. जंबो हॉटेला मेरेन पावपा खातीर मुख्य टर्मिनला कडल्यान फक्त 15 मिण्टांची वाट चलत वच्ची पडटा. शटल बशींतल्यान वचत जाल्यार 5 मिणटां लागतात.
ह्या हॉटेलाचें खाशेलपण म्हणल्यार ताचें कॉकपीट सूट. विमानाच्या ह्या भागांत एका काळार पायलट बसून विमान उडयताले, आतां शंय एक आलिशान सूट केला. थंयच्यान विमानतळाचे धांवपट्टीचो पॅनोरमीक व्ह्यू (चारूय वटांतलो वाठार) दिसता, जो खंयच्याय प्रवाशा खातीर एक सपनां भशेन अणभव दिता.
हॉटेलाचें निर्माण करतना सगळीं सिटां काडून ताका पुराय तरेन सॅनिटायज केल्लें. ताका एकाद्या सामान्य इमारती भशेन केल्या, जातूंत वातावरण नियंत्रण आनी इंसुलेशनाची पुराय जतनाय घेतल्या, कारण सोयऱ्याक शीं वा गरमी जाणवची न्हय. विमानाचो इतिहास जिवीत उरचो हे खातीर कांय गजाली आशिल्ल्यो तश्योच दवरल्यात. देखीक सींका कडेन लायिल्ल्यो सुचोवण्यो आनी इमरजन्सी एक्झिटाचो सुचोवणी तकटो. कॉकपिटांत पालयटाचो आदलो कंट्रोल पॅनल आनी स्वीच आयज लेगीत थंय आसा. ह्यो गजाली कुडीची सोबितकाय आनी उमेद वाडयता. हॉटेलांत रावपी सोयऱ्यां खातीर कितलेशेच पर्याय उपलब्ध आसात. थंय डॉरमेण्ट्री ते तीन खाटींचे कॉम्बो रूम आसात. पुराय विमानांत हाय- स्पीड वायरलेस ब्रॉडबॅण्ड सुविधा उपलब्ध आसा.
विमानाच्या पयल्या माळ्यार (अपर डॅक) जंय एका काळार फर्स्ट क्लास कॅबीन आसतालें, थंय आतां स्टायलीश 24 वरां उक्तें आसपी कॅफे केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
