भांगरभूंय | प्रतिनिधी
आयच्या काळांत शाळेंत, विद्यार्थ्यांक शिकोवपाक नवीन पद्दतींचो वापर करप सामकें गरजेचें जालां, जातूंतल्यान विद्यार्थ्यांक शिकप सोंपें, मजेचें आनी आकर्शकुय जातलें.
शॅडो पपेट्री ही कला सुमार साडेतीन हजार वर्सां साकून चलत आयल्या. हे पारंपरिक कलेक ‘चामड्याची बावली’ अशेंय म्हणटात. चामड्या पसून तयार केल्ली आकृती पड्ड्या फाटल्यान दाखोवन चड करून पौराणिक काणयो सादर करतात. सादर करपी कलाकारांक बावलेकार म्हणटात. केरळचो तोलपावाकूथू, ओरिसाचो रावण छाया आनी चीनाचो पाय यिंग झी हे शॅडो पपेट्रीचे सामके लोकप्रीय फाॅर्म जावन आसात. थंय तिचे अजून शेंकड्यांनी प्रेक्षक आसात.
आयच्या काळांत शाळेंत, विद्यार्थ्यांक शिकोवपाक नवीन पद्दतींचो वापर करप सामकें गरजेचें जालां, जातूंतल्यान विद्यार्थ्यांक शिकप सोंपें, मजेचें आनी आकर्शकुय जातलें. ही सुंदर अशी कला जर माणकुल्यांक शिकोवपाक वापरली जायत जाल्यार भुरग्यांक ती बरे तरेन समजतलीच पूण त्या शिवाय तो अणभव, तीं केन्नाच विसरचीं नात. म्हाका तरी हातूंत दुबाव दिसना. इतलेंच न्हय तर शॅडो पपेट्री खातीर तांकां प्रत्यक्ष अणभव आनी सृजनशिलतायेक प्रोत्साहन पसून मेळटलें.
हाचोच प्रयोग फोंडें एज्युकेशन सोसायटीच्या शिक्षणशास्त्र महाविद्यालयांत (P.E.S.C.O.E.) गोंय अस्मिताय दिसा घडोवन हाडिल्लो. हे सर्तींत एकूण णव पंगड आशिल्ले. जांणी वेग – वेगळ्या विशयांत एक धडो शॅडो पपेट्रीच्या स्वरुपांत सादर केल्लो. मनसशास्त्र ह्या विशयांत मोटिवेशन अॅण्ड इमोशन, कोंकणीत वडापूनव, गणितात फ्रॅक्शन्स आनी आकार, कम्प्युटराचे भाग तशेंच विज्ञान ह्या विशयांत वोटर सायकल आनी फूडचेनाचे धडे एकदम सोप्पे आनी सरळ पद्धतीन सादर केल्ले.
हे सर्तीचे परिक्षण नामनेचे डॉ. विनायक मोरे हांणी केलें. जे गोवा विद्याप्रसारक मंडळ (GVM) संचालीत डॉ. दादा वैद्य कॉलेज ऑफ एज्युकेशन, फोंडें फर्मागुडी हांगा सहायक प्राध्यापक म्हणून कार्यरत आसात. तशेंच गणपत पार्सेकार शिक्षणशास्त्र महाविद्यालयात सहायक प्राध्यापक आशिल्ले प्रीतेश नायक हांणी केलें. हो प्रयोग परफॉर्मिंग आर्ट्स ह्या विशयांत तज्ञ आशिल्ले आमचे शिक्षक शशिकांत पवार हांच्या मार्गदर्शना खाला घडोवन हाडिल्लो.
अशे म्हणटात की मूळ कोडू आसल्यार चलता पुण फळ मात गोड असपाक जाय. तशेच हो पुराय प्रयोग करतना खुब आडमेळें आयलें खरे, पुण सादरीकरण केले उपरांत जी सगल्यांच्या तोंडार खोशी आशिल्ली ती पळोवन मन धादोशी जालें.
खुशी प्रभुदेसाय
पीईएस शिक्षणमहाविद्यालय, फोंडें
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
