भांगरभूंय | प्रतिनिधी
प्रदेशाध्यक्षपदार वेंचून आयिल्ल्या एक वर्स जाल्ल्यान मडगांवां कार्यावळ
मडगांव : येवपी विधानसभा वेंचणूक २०२७ त जातली आनी आपणा कडेन बारा म्हयन्यांचो काळ आसा. ह्यान पयलींच्यो वेंचणुको १४ फेब्रुवारीक जाल्ल्यो आनी मार्चांत निकाल लागिल्लो. हाका लागून आतां वाट पळयत रावपाचें ना. जैताचो रथ मुखार व्हरपा खातीर काम करप, असो उलो प्रदेशाध्यक्ष दामू नायक हांणी मारलो.
दक्षीण गोंय जिल्लो कार्यालयांत भाजप प्रदेशाध्यक्ष म्हणून निवड जाल्ल्याक एक वर्स पुराय जाल्ल्यान प्रदेशाध्यक्ष दामू नायक हांचो भोवमान केलो. ह्या वेळार दक्षीण गोंय जिल्लो समिती अध्यक्ष प्रभाकर गांवकार, शर्मद रायतूरकार, श्वेता लोटलीकार आनी हेर हाजीर आशिल्ले.
वर्स मनोवपाचो कांयच विचार नाशिल्लो, मात कार्यकर्त्यांनी खूब आग्रो केल्ल्यान हो उत्सव मनयला. भाजपचे केंद्रीय समितीकडल्यान राज्यांत जायते उपक्रम आनी कार्यावळी मनोवपाक सांगतात आनी खाची- कोनशांतले कार्यकर्ते तितल्याच नेटान ह्यो चालीक लायतात. कार्यकर्त्यांचे मेहनतीचें फळ वेंचणुकेक मेळतूच आसता. भाजप सदांच फक्त मतदारांचे उदरगतीचे नदरेन काम करता, तांकां गरजेचो आशिल्लो उपक्रम राबयत आसता. मात कांय विरोधी पक्ष फकत वेंचणुके पुरते मतदारांच्या दारार वतात. कांय मतदारूय तांच्या बढायांक भुलतात आनी मतदान करतात, अशें दामू नायक हांणी मुखार म्हणलें.
भाजप सगलीं आव्हानां परतूय लायत पुराय देशभर मार्गक्रमण करता. काश्मिर, बिहार, दिल्ली, अरुणाचल प्रदेश, आसाम, मुंबय सयत महाराष्ट्रांतल्यो वेंचणुको जिखल्यात. गोंयची जिल्लो पंचायत वेंचणुके वेळार प्रतिकूल परिस्थिती आसतनाय मुख्यमंत्री डॉ. प्रमोद सावंत हांचे सयत कार्यकर्त्यांच्या सहकार्यांतल्यान भाजपाक बरें येस मेळिल्ल्याचें नायक हांणी सांगलें.
मतभेद आसतले मात मनभेद नात
राज्यांत ५१ टक्के मतदानाचो टक्का घेवपाचो हेतू आशिल्लो आनी ४६ टक्क्यां मेरेन पावल्यात. हातूंत मंत्री, आमदार हांचे सयत कार्यकर्त्यांनी कश्ट घेतले. कांय मतभेद आसतले मात मतभेद खंयसरूच नाशिल्ले. ह्यान फुडल्या काळांतूय जायतीं आव्हानां मुखार येतलीं, ताका तोंड दीत मुखार वयचें पडटलें, अशें नायक हांणी म्हणलें.
आतां पालिका वेंचणुको येतल्यो. फोंडें वेंचणूक आसतली. फोंडें पोटवेंचणुकेंत भाजपाक अपशकुन करपाक विरोधी पक्ष काम करीत आसात. कांय मतभेद आसल्यार ते कुशीक दवरपाची गरज आसा. जिल्लो पंचायत वेंचणुकेंत आनीक नेट लायिल्लो जाल्यार चार सुवातो आनीक जिखूं येताल्यो. कांय सुवातांचेर उमेदवारांचेर निर्शेवणी आनी कार्यकर्त्यांमदीं मतभेद आशिल्ल्यान दुसर्या पक्षाक मतां मेळ्ळ्यांत. ताचो बोवाळ विरोधकांनी करचो न्हय. ह्यान फुडें अशे जावपाक दिनासतना सगल्यांक एकठांय हाडल्यार संवसारांत भारताक विश्वगुरू करपाचें सपन सहज पुराय करूं येता, अशेंय दामू नायक हांणी मुखार म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
