भांगरभूंय | प्रतिनिधी
पणजी: चिंबलीच्या प्रस्तावीत ’युनिटी मॉल’ आनी ’प्रशासन स्तंभ’ प्रकल्पा आडचें आंदोलनाक आतां ’गाकुवेध’ संघटणेन तेंको जाहीर केला. २८ डिसेंबरा सावन थळाव्या ग्रामस्थांनी आपयिल्ल्या उपोशणान आयज २२ व्या दिसांत प्रवेश केला. जो मेरेन प्रकल्प अधिकृतपणान रद्द करिना, तो मेरेन आमी फाटीं सरचे नात, असो निर्धार आंदोलकांनी उक्तायला.
बिरेस्तारा ग्रामस्थांनी विधानसभेर व्हड मोर्चा काडिल्लो. अधिवेशन सुरू आशिल्ल्यान पुलिसांनी हो मोर्चा मेरशेच आडायलो. शुक्रारा जाल्ले चर्चेंत मुख्यमंत्र्यांनी दिल्ल्या आस्वासना प्रमाण, सोमारा वा मंगळवारा मेरेन ह्या प्रकल्पा विशीं सरकार आपली अधिकृत भुमिका स्पश्ट करपाची शक्यताय आसा. सरकाराच्या ह्या निर्णयाचेरूच आंदोलनाची फुडली दिका निंबून आसतली, अशें कदंब पठाराचेर हेर आंदोलकां सयत उपोशणाक बशिल्ल्या अजय खोलकार हांणी सांगलें. आतां मेरेन सरकारा कडल्यान कसलेच तरेची लेखी वा अधिकृत पत्र मेळूंक नाशिल्ल्याचें तांणी सांगलें. गाकुवेध संघटनेन ह्या आंदोलनाक तेंको दिल्ल्यान हें आंदोलन खर जावपाची शक्यताय आसा.
गाकुवेध वावुरप्यांची भेट
सोमार, मंगळार मेरेन निर्णय घेवपाचे आस्वासन सरकारान दिलां. निर्णय आयलो ना जाल्यार आंदोलन आनीक खर जातलें, अशें चिंबल जैवविविधताय मंडळ समितीचे अध्यक्ष गोविंद शिरोडकार हांणी सांगलें.
गाकुवेधचे कार्यकर्ते ज्ञानेश्वर पिळगावकार (खांडेपार), रामकृष्ण जल्मी (केरी), हर्षा वाडकार (केरी), निलेश गावडे (खांडेपार), देवानंद गावडे (सत्तरी) हांणी आंदोलकांची भेट घेवन तेंको दिला. हाचे फुडे गाकुवेधचे वांगडी लेगीत आंदोलनात वाटो घेवपाचे आसा.
गोंय वाटावपा खातीर आयज कोणे तरी गांधी जावपाची गरज आसा. चिंबलकारांक सगळ्या गोंयकारांचो तेको मेळटलो, अशें काँग्रेस पदाधिकारी जॉन नाझारेथ हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
