भांगरभूंय | प्रतिनिधी
उत्तर गोंय जिल्लो गिरायक कागाळ निवारण आयोगाचो आदेश: नवीच गाडी! मात, सेगीत बंद पडटाली
पणजी: सांताक्रुजच्या एका गिरायकान म्हारग गाडी विकती घेतिल्ली. मात नवी आसूनय हहे गाडयेंत सेगीत इबाड येतालो. सेगीत येवपी तांत्रीक इबाडाक लागून मनस्ताप सोसपाचो पडिल्ल्यान ह्या गिरायकाक उत्तर गोंय जिल्लो गिरायक कागाळ निवारण आयोगान आतां सुशेग दिला. विकत घेतिल्लें वाहन सारकें नाशिल्ल्याचें सांगीत आयोगान वाहन कंपनी आनी वाहन विक्रेत्यांक १५ लाख रुपया गिरायकाक रिफंड करपाचे आदेश दिल्यात.
हे विशीं चड म्हायती प्रमाण, सांताक्रुझच्या एकल्यान १० सप्टेंबर २०२३ दिसा २४ लाख ४० हजार ६६६ रुपया खर्च करून सात सिटांची गाडी घेतली. ही गाडी घेवपाक तांणी २३ लाख रुपयांचें वाहन रीण घेतिल्लें. मात लाखांनी रुपया खर्च करून ही गाडी फकत चार म्हयनेच सारकी चल्ली. एकदां सकाळीं भुरग्यांक शाळेंत सोडपाक वतना अचकीत गाडी बंद पडली. दुरुस्ती केले उपरांत वट्ट स दिसांनी गाडी परत मोडली. ती बंद पडली. सेगीत येवपी तांत्रीक इबाडाक लागून ही गाडी चलोवप असुरक्षीत आशिल्ल्याचें गिरायकाक समजलें. हे विशीं तांणी संबंदीत कंपन्यांक कायदेशीर नोटीस धाडली, मात तांणी आडनदर केल्ल्यान निमाणी तांणी गिरायक आयोगाकडेन धांव घेतली.
ह्या प्रकरणाचे सुनावणे मजगतीं, वाहन कंपनीन उत्पादनांतले दोशांचे आरोप भायर मारले. कागाळदारान आपलो दावो सिद्ध करपा खातीर कसलोच तज्ञ अहवाल सादर करूंक नाशिल्ल्याचो युक्तिवाद कंपनीन केलो. मात, आयोगाची अध्यक्ष बेला नायक हांणी हो युक्तिवाद अमान्य केलो. व्हड रक्कम मेजले उपरांतूय गाडी सेगीत बंद पडटा आनी गिरायकाक ती चलोवपाक धोक्याची आशिल्ल्याचें दिसता, जाल्यार हो गंभीर दोश आशिल्ल्याचें आयोगान नमूद केलें. सेगीत जावपी इबाडाक लागून गिरायकाक मानसी त्रास आनी अपमानाचे परिस्थितीक तोंड दिवचें पडिल्ल्याचें निरीक्षण नोंद करीत आयोगान कंपन्यांक जापसालदार धरलां आनी १५ लाख रुपया परतावो दिवपाचो निकाल दिला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
