कोंकणी तरणाटो सगल्या मळार मुखार आसपाक जाय

भांगरभूंय | प्रतिनिधी

मुख्यमंत्र्याचो गोंयच्या तरणाट्यांक उलो

27 व्या गोवा युवा महोत्सवाचें दबाज्यान उक्तावण

युगांक नायक हांकां युवा उर्बा पुरस्कार

भांगरभूंय । प्रतिनिधी

फर्मागुडी- फोंडें (माणिकराव गावणेंकार नगर) : कोंकणी उलोवपी तरणाटो सगल्या मळांचेर मुखार आसपाक जाय. ते खातीर ताका उर्बा मेळप तितलीच गरजेची. देखून आमचें सरकार यत्न करता. आपलें मुळावें शिक्षण मराठींतल्यान जाल्लें आसलें तरीय कोंकणी भाशेच्या उत्कर्शा खातीर, राज्य सरकाराच्या माध्यमांतल्यान जें- जें कितें करपाक जाता तें- तें आमी करतात. विधानसभेच्या पलटाचेर कोंकणी राजभास कशी आनी कोंकणी रोमी कशी ना, हें सांगपी पयलो मुख्यमंत्री आपुणूच आसा, अशें मुख्यमंत्री डॉ. प्रमोद सावंत हांणी सांगलें.

कोंकणी भाशा मंडळान बांदोडेंची अंत्रुज घुडयो संस्था आनी गोंय विद्याप्रसारक मंडळ फोंडा हांच्या पालवान फर्मागुडयेच्या जीव्हीएम म्हाविद्यालयाच्या मैदानाचेर आयोजीत केल्ल्या 27 व्या गोवा युवा महोत्सवाच्या उक्तावण सुवाळ्यांत मुख्यमंत्री डॉ. सावंत मुखेल सोयरे म्हूण उलयताले. ह्या वेळार माचयेर मानाचे सोयरे म्हूण बांदोडेंचे सरपंच रामचंद्र नायक, येवकार अध्यक्ष नरेंद्र सावयकार, कार्याध्यक्ष पुरुषोत्तम वेर्लेकार, वेवसायीक राजेश तारकार, जीव्हीएम शिक्षण संस्थेचे अध्यक्ष कृष्णा शेट्ये, मुख्य संयोजक तानाजी गावडे, कोंकणी भाशा मंडळाची अध्यक्ष रत्नमाला दिवकार हाजीर आशिल्ली.

आमच्या सरकाराच्या माध्यमांतल्यान लोकसभा आनी राज्यसभेंत आयज कोंकणी अनुवादक निर्माण जाल्यात. गोंयांत येवपी पोस्टमनाक लेगीत कोंकणी येवपाक जाय. फुडारांत गोंयांतल्या तरणाट्यांकूच पोस्टमनाची नोकरी मेळटली अशें वातावरण आमी निर्माण केलें. तशेंच गोंयांत जे आयएएस अधिकारी येतात तांकां लेगीत कोंकणी येवची हे खातीर गोवा कोंकणी अकादेमीचे वतीन तांकां प्रशिक्षण दिवपाचें काम केलें, जे वरवीं गोंयांतल्या लोकांचो आत्मस्वर तांकां कळटलो आनी ते बरें प्रशासन दिवपाक शकतले, अशें मुख्यमंत्र्यान सांगलें.

ह्यावेळार कोंकणी वावुरपी, संशोधक युगांक नायक हांकां मुख्यमंत्र्यांचे हस्तुकीं युवा उर्बा पुरस्कार भेटयलो.

आयच्या स्पर्धात्मक युगांत गोंयांतल्या तरणाट्यांनी सर्वकश ज्ञान मेळोवप गरजेचें आसा. गोंय सरकारान तांचे खातीर सुरू केल्ल्या स्पर्धात्मक परिक्षांची तांकां जाण आसपाक जाय. संघर्श करप हो जरी तरणाट्यांचो स्थायीभाव आसलो तरी लेगीत तरणाट्यांनी आपल्यो लागणुको लेगीत विसरपाक जायना. त्या काळार विद्यार्थ्यांनीच संघर्श केलो म्हूण आयज ‘हाफ तिकेट’ आनी विद्यार्थ्यांक विद्यापिठाच्या माध्यमांतल्यान हेर अधिकार मेळ्ळ्यात, अशें मुख्यमंत्र्यान सांगलें.

गोंयकारांक हक्काचें आरक्षण

मुख्यमंत्री डॉ. सावंत हांणी सांगलें, आयज आमी ज्यो संदी निर्माण केल्यात, ताची पुराय म्हायती आयच्या तरणाट्यांनी करून घेवची. केंद्र सरकाराच्या माध्यमांतल्यान आयज गोंयांत भोवउद्देशी अशी नॅशनल फॉरेन्सीक सायन्स, इंटरनॅशनल स्कूल ऑफ लॉ, आयुष महाविद्यालय सारकिल्ल्या साबार शिक्षणीक संस्थांतल्यान गोंयांतल्या भुरग्यांक हक्काचें आरक्षण दवरलां. मात अजून कांय तरणाट्यांक ताची म्हायतीच ना, हें बरोबर न्हय.

शॉर्टकटाची अपेक्षा दवरिनासतना नीट सारके परिक्षेंतल्यान आपली गुणवत्ता सिद्ध करात. केंद्र सरकार आनी प्रधानमंत्री नरेंद्र मोदी हांच्या यत्नांतल्यान आयज गोंयांत देशांतलें एकसुरे अशें नॅशनल वॉटर स्पोर्ट इन्स्टिट्यूट, अंटार्टिका मोहिमेचेर वचपा खातीर फायद्याचें थारपी पोलर इन्स्टिस्ट्यूट वास्को, सारकिल्ल्या जिणेक मोडण दिवपी संस्था हांगा स्थापन जाल्यात. हॉस्पिटलिटी कोर्स, कृशी महाविद्यालय सुरू जालां. वेस्ट मॅनेजमेंट सारकिल्लो देशांतलो एकसुरो अभ्यासक्रम साळगांवां सुरू जाला. व्हेटर्नरी महाविद्यालय सुरू जावपाच्या मार्गार आसा. आमच्या तरणाट्यांनी हे संस्थेच्या माध्यमांतल्यान आपलो फुडार घडोवपाक जाय. जांकां उद्देग वेवसायांत आपले कर्तृत्व सिद्ध करपाचें आसा, तांचे खातीर लेगीत आमच्या सरकारान खूबस्यो येवजण्यो सुरू केल्यात. सुलभ रीण येवजण्यो निर्माण जाल्यात. सगल्यांचो लाव घेयात आनी नोकऱ्यो निर्माण करपी लेगीत जायात, अशें मुख्यमंत्र्यान सांगलें.

संधी तुमी घेनात जाल्यार…

जे तरणाटे सृजनशील आसात, त्या सृजनशील तरणाट्यां खातीर लेगीत आमचे कडेन खूबश्यो कार्यावळी आसात. गोंयांतल्या तरणाट्यांक एक सकारात्मक मार्ग दाखोवपाचें काम युवा महोत्सवा सारके कार्यावळींतल्यान जावपाक जाय, ते खातीर लेगीत आमी यत्न करतले. आयचो आमचो तरणाटो स्वताच्या पांयाचेर उबो राविल्लो आमकां पळोवपाक आवडटलो. आमी निर्माण केल्ल्यो संदी आनी सोयीसुविधा तुमी घेतल्यो नात जाल्यार कोणतरी दुसरो तो निश्चीत घेतलो, अशेंय मुख्यमंत्र्यान सांगलें.

हांगाच्या आमच्या न्हंयांचो आमकां अभिमान आसा. म्हादयचेर आमी मोग करतात. निर्माण जावपी नव्या जिल्ह्याक आमी त्याच मोगांतल्यान कुशावती हें नांव दिलां. सरकार आपले तरेन यत्न करता. हांगाची सैमीक जलसंपदा सांबाळपाचें काम तरणाट्यांनी लेगीत करपाक जाय. न्हंयो प्रदुशीत करूं नाकात. आपलो वाठार बुरसो करूं नाकात. आयज फक्त कोयर उखलपाकूच सरकाराक दर वर्सा 500 कोटी रुपया खर्च करचे पडटात. त्या कोयराचेर प्रक्रिया करपाक आनीक कितलोच खर्च जाता. हो सगलो कोयर तुमीच निर्माण केला, अशें मुख्यमंत्री डॉ. सावंत हांणी सांगलें.

नरेंद्र सावयकार हांणी येवकार दिलो जाल्यार कार्याध्यक्ष पुरुषोत्तम वेर्लेकार हांणी प्रास्तावीक केलें.

‘गोंयांतल्यो नोकऱ्यो गोंयकारांकूच मेळच्यो’

गोंयांतल्यो नोकऱ्यो ह्यो गोंयांतल्या कोंकणी समजपी तरणाट्यांकूच मेळच्यो. तेच वांगडा कर्तबगार, शिक्षीत आनी ज्ञानी तरणाट्यांक त्यो मेळच्यो हे खातीर स्टाफ सिलेक्शन प्रणाली सुरू करतनाच, ते परिक्षेंत कोंकणीच्या पेपराची सक्ती करपी हें आमचेंच सरकार आसा. आयज गुगलांत स्टाफ सिलेक्शन हें उतर विक्रमी वेळा सोदलां, हें आमचें सगल्यांचें येस आसा. गरिबांतल्या गरीब घरांतलो भुरगो आपले गुणवत्तेच्या आदाराचेर उच्च पदाचेर पावपाक शकता, तें आमचे कार्यपद्दतीक लागुनूच, अशें मुख्यमंत्र्यान सांगलें.

आयज समारोप सुवाळो

आयज आयतारा 18 जानेवारीक सांजवेळार 5 वरांचेर जावपी समारोप सुवाळ्यांत मुखेल सोयरे म्हूण नगरसेवक विश्वनाथ (अपूर्व) दळवी हाजीर आसतले. नाटककार श्रीधर कामत बांबोळकार आनी गोंय विद्याप्रसारक मंडळाचे आमसभेचे अध्यक्ष भास्कर खंडेपारकार मानाचे सोयरे म्हूण हाजीर आसतले. काल विवीध सर्ती जाल्यो. तातूंत राज्यांतलीं साबार म्हाविद्यालयां, संस्था वांटेकार जाल्यो. आयजूय वेगवेगळ्यो कार्यावळी, सर्ती जातल्यो.