भांगरभूंय | प्रतिनिधी
आयच्या संवसारांत लोकांचें लक्ष आनी तोखणायेंत एक विचित्र बदल आमकां दिसता. एका कार्यावळींत एक सेलिब्रिटी पावतकच व्हड प्रमाणांत गर्दी जाता, पूण वास्तव जिणेंत योगदान दिवपी आमचे मुखार उबे रावल्यार तीच उमेद उणी जाता. आयज आमच्या प्राधान्यांत खूब बदल जाला. समाजाक खऱ्या अर्थान योगदान दिवपी लोक-सैनिक, शिक्षक, शेतकार आनी समाजसेवक- चड करून लक्षांत येना. ताचे बदला आमी सिनेमा स्टार आनी सोशल मिडिया
प्रभावक हांकां भाव दितात. ही परिस्थिती एक व्हड प्रस्न उप्रासता: आमी
आदर आनी तोखणायेचें खरेंच सार विसरतात काय?
समाजाच्या प्राधान्यांत बदल
एक काळ आसलो जेन्ना शौर्य, प्रामाणीकपण आनी कश्टाक मान दिताले. लोक स्वातंत्र्य झुजारी, शास्त्रज्ञ आनी समाजसुदारक हांचे कडेन आदारान पळयताले. पूण आयज विचित्र कपडे घालपी, वायट उतरां वापरपी आनी वाद निर्माण करपी लोकांक चड मान मेळटा अशें दिसता. ही गोयची संस्कृताय न्हय. गिन्यान, शिस्त आनी बऱ्या मुल्यांची कदर करचे परस लोकांक मनरिजवण हांची चड आवड जावपाक लागल्या.
आमचे विचार बदलपाक सोशल मिडियाचो व्हड वांटो आसा. आमी आतां ट्रेंडांचेर दोळे धापुन विश्वास करतात. कोणेंय गाळी घालपी भास वापरून व्हायरल व्हिडियो तयार केल्यार लोक तांकां ‘कूल’ म्हणपाक लागतात. दुर्दैवान खऱ्या मणश्याक -आमच्या आवय-बापायक, शिक्षकांक, दोतोरांक आनी सैनिकांक-उणें मोल मेळटा.
भायल्या संस्कृतायचो प्रभाव
विदेशी संस्कृतायेन आमचेर जायत्या तरांनी प्रभाव घाला. कांय बदल बरे आसात, जशे की लैंगिक समानताय आनी आधुनीक तंत्रगिन्यान. पूण कांय ट्रेंड हानीकारक आसतात. तरणाट्यांक आपले परंपरेक मोल दिवचे परस भायली फॅशन आनी जिणे पद्दतीची नक्कल करपाची चड आवड आसा. भारतीय संस्कृताय आमकां आदर, सादेपण आनी दयाळपण शिकयता, पूण आयची पिळगी चड करून ह्या मुल्यां कडेन दुर्लक्ष करता. वायट उतरां वापरप आनी सोरो पियेवप हो ट्रेंड म्हण जायते फिल्मांनी दाखयतात, आनी तें आमकां खरें दिसता. खरें मोल शिक्षणांतल्यान आनी सामाजसेवेंतल्यान येता हें आमी विसरुंक जायना.
प्रसार माध्यम आनी समाजाची भुमिका
आमच्या विचारांक आकार दिवपाक प्रसार माध्यमांचो बरोच वांटो आसा. खबरां चॅनल, सिनेमा, सोशल मिडिया प्लॅटफॉर्म चड करून सेलिब्रिटींचो प्रचार करतात, जशें की फक्त तेच तोखणाय करपा सारके आसात. हाका लागून सामान्य लोकांक हीच आधुनीकताय अशे दिसता. पूण एक खीण विचार करूंया-आमी दुयेंत आसतना आमकां कोण आदार करता? रात दीस आमच्या देशाची राखण कोण करता? आमच्या फुडाराक आकार दिवपी गिन्यान आमकां कोण शिकयता? ताची जाप सादी आसा: दोतोर, सैनिक, शिक्षक आनी हेर समाज सेवक. तरी तांकां फावो तो मान मेळटा सो दिसना. समाजान आपली नदर बदलपाची गरज आसा. जिणेंत शो-ऑफ करपी लोकांक मोल दिवप बंद करचें पडटलें आनी समाजात सकारात्मक फरक घालपी लोकांची कदर करपाक सुरवात करची पडटली.
आमी कितें करूंक शकतात?
दोतोर, शेतकार, शिक्षक, सैनिक हांचे योगदान वळखुपाक आनी मान दिवपाक सुरवात करया. तांचीं प्रेरणादायक कथा सोशल मिडियाचेर शेअर करात. गिन्यान, दयाळपण, समाजीक जागृताय पातळावपी लोकांचो प्रचार करया. समाजा खातीर कश्ट करपी कितलेशेच व्हड व्यक्ती गोयान आसात. गोयची संस्कृताय गिन्यानान भरिल्ली आसा. आमचे सण मनोवया, आमच्या जाण्ट्यांक मान दिवया, आमच्या भुरग्यांक आमच्या इतिहासा विशीं शिकोवया. सोशल मिडिया हें एक बळिश्ट साधन. नकारात्मकताय पातळावपाक ताचो वापर करचे परस हेरांक प्रेरीत करपाक आनी खऱ्या प्रस्नांचेर लक्ष हाडपाक ताचो वापर करुया.
सर्वेश मळकर्णेकार
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
