भांगरभूंय | प्रतिनिधी
भांगरभूंय । प्रतिनिधी
पणजीः राज्यात 91 सोऱ्याचें पसरे आनी बार शाळेच्या 100 मीटर सुवाते भितर आसात. सगळ्यांत उण्या अंतराचेर आशिल्ले दोन सोऱ्याचें पसरे काणकोण म्हालांत आसात. पूण फाटल्या वर्सा भितर सान पिरायेच्या भुरग्यांक सोरो विकप्यांचेर कारवाय जावंक ना, अशी म्हायती मुख्यमंत्री डॉ. प्रमोद सावंत हांणी विधानसभेच्या पटलार दिल्या.
लेखी जापेत जारी केल्ले आंकडेवारींत मुख्यमंत्री तशेंच वित्तमंत्री डॉ. प्रमोद सावंत हांणी सांगलें 91 पसऱ्या मदले सगळ्यांत चड 29 पसरे आनी बार तिसवाडी म्हालांत आसात. जाल्यार शाळेच्या सगळ्यांत लागीं 7 मीटराचेर आशिल्लो कॅरन बार एन्ड रेस्टोरंट, दुसरे सुवातेर 8 मीटराचेर आशिल्ले शुभम बार एन्ड रेस्टोरेंट हे चावडी काणकोण हांगासर आसात. जाल्यार तिसरे सुवातेर शाळे पासत 13 मीटर लागीं पणजेचे भोसले सितालय हे तिसरे सुवातेर आसा.
जाल्यार शाळे पासत 80 मीटर पयस तीन बार आनी पसरे, 70 मीटर पयस पांच बार आनी पसरे, 60 मीटर स बार आनी पसरे, 30 मीटर पयस तीन बार आनी पसरे, 40 मीटर पयस चार बार आनी पसरे आनी 90 मिटीर पयस स बार आनी पसरे आसात.
संबंदीत म्हालांतले अबकारी स्टेशनांतले अबकारी निरिक्षक नियमीत आपले वाठारांत सोऱ्याच्या पसऱ्यांची पळोवणी करतात. फाटल्या वर्सा भितर सान पिरायेच्या भुरग्यांक सोरो विकप्याचो कागाळी येवंक नात तशेंच सान भुरग्यांक सोरो विकपा विशींची कसलीच प्रकरणा सोरो विकपी आस्थापन आड जावंक ना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
