भांगरभूंय | प्रतिनिधी
भांगरभूंय । प्रतिनिधी
पणजीः वीज कामगारांक जिवे मारपाची धमकी दिल्याची कागाळ सहायक अभियंते काशिनाथ शेट्ये हांणी पणजी पुलिशेंत केल्या. बेकायदो केबल कातरपाक गेल्ले तेन्ना डिजीटल नेटवर्क आणि एड्जकोम टेलीकोम्युनिकेशन ह्या कंपनींच्या लोकांनी एका राजकारण्याचें नांव घेवन जिवे मारपाची धमकी दिली अशें शेट्ये हांणी कागाळींत म्हणलां.
कागाळींत म्हणलां की, पणजे वाठारांत बेकायदो केबल काडपाचे काम हातांत घेतलां. ह्या कंपनीच्या लोकांनी हडबडीत रितीन इंटरनेट केबल कमकुवत जाल्ल्या लायटीच्या खांब्यार मारून लोकांचो जीव धोक्यांत घालून उच्च न्यायालयाचो अवमान केला. वीज खात्याचें मालमत्तेक हात लायल्या प्रकरणांत जेन्ना हांकां जाब विचारली तेन्ना डिजीटल नेटवर्क आनी एड्जकोम टेलीकोम्युनिकेशनाच्या लोकांनी खात्याच्या कर्मचाऱ्यांक तांचे कर्तव्य करपा पासत आडयलें.
उपरांत तांणी एका राजकारण्याची आपल्याक मजत मेळटा अशे सांगून सरकारी अधिकाऱ्यांचेर चेंपण घालपाक सुरवात केली. ही कारवाय फाटी घेनाजाल्यार तुमकां जिवे मारून उडयतां, अशी धमकी तांणी दिली. देखून हांचेर गुन्यांव नोंद करून ह्या प्रकरणाची चवकशी करची, अशी मागणी शेट्ये हांणी कागाळींत केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
