भांगरभूंय | प्रतिनिधी
पणजीः केरी -सत्तरींतल्या गोवन स्पायस ह्या हॉटेलाचेर एफडीएन धाड घाली. ह्या वेळार कांय नेम पाळूंक नाशिल्ल्याचें दिसलें. सगळें सुदारून 15 दिसां भितर अहवाल सादर करपाची सुचोवणी दिल्या.
रांदचे कुडींत भाजी कापपाक वापरिल्लो सुरो गंज आयल्लो आशिल्ली. सगळे ड्रॉअर उक्ते आशिल्ले आनी ते सारकें निवळ नाशिल्ले. रांदचे कुडींत गरजे भायर सामान मेळ्ळे आनी सगळी कडेन ते पातळिल्ले आशिल्ले. पिवपाच्या उदकाची आयदना निवळ नाशिल्ली. तशेंच उदका चांचणेचो अहवाल सादर करूंक नाशिल्लो. कच्चो म्हाल योग्य लेबलां नासतना मेळ्ळो. रांदचे कुडींत सिंथेटिक फूड कलर मेळ्ळो. कच्चो म्हाल सांठोवन दवरतना पद्दत पाळूंक नाशिल्ली. प्रशिक्षण प्रमाणपत्र सादर करूंक ना. दुकान बंद केल्या उपरांत योग्य नितळसाण जावंक नाशिल्ल्याचें दिसून आयलें. वयल्यो सगळ्यो चुक्यो 15 दिसां भितर सुदारून एफडीए कार्यालयांत अहवाल सादर करपाची सुचोवणी दिल्या. थारायिल्ल्या काळा भितर पाळो दिवंक ना जाल्यार फुडली कारवाय करपाची शिटकावणी एफडीएच्या अहवालांत दिल्या. मजगतीं, गोवन स्पायसाचो धनी म्हापशेंचे ‘इनाफ इज इनाफ’ सभेक हाजीर राविल्लो म्हूण ताचेर ही कारवाय केल्या, अशें कांय जाणांचें म्हणणें आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
