काजू सोरो उत्पादनाची पावणी रोखडीच

भांगरभूंय | प्रतिनिधी

सोऱ्याचो दर 1 हजार रुपया दर 15 लिटर निश्चित

पणजीः वर्स 2025 च्या काजू हंगामा खातीर गोंयांत काजूच्या रोसा पसून सोऱ्याचें उत्पादन करपाचो हक्क दिवपा खातीर अबकारी खातें पावणी घडोवन हाडटले. चडांत चड प्रमाणांत सोरो उत्पादनाची हमी दिवपी बोली धारकां खातीर ही पावणी आसतली. 15 लीटराच्या जारा फाटल्यान 1 हजार रुपया इतलो सोऱ्याचो दर निश्चित केला, अशी कळोवणी गोंय अबकारी आयुक्ताचे कचेरेन जारी केल्या.
गोंय अबकारी शुल्क नेम 1964च्या नेम 72 (2) खाला स्थापन केल्ले समिती सामकार ही पावणी धारबांदोडें म्हाल सोडल्यार हेर इकराय म्हालां खातीर आसतली. ह्या 11 म्हालांचे उत्तर गोंय आनी दक्षीण गोंय अशा दोन झोनांनी वर्गीकरण केलां.
उत्तर गोंय काजू विभागांत बार्देस आनी दिवचल म्हाला खातीर 4 फेब्रुवारी आनी तिसवाडी, पेडणें आनी सत्तरी म्हाला खातीर 5 फेब्रुवारी ह्या दिसा स्वामी विवेकानंद हॉल, जुन्ता हावस, पणजे सकाळीं 11 वरांचेर सुरु जातली.
दक्षीण गोंय विभागांत मुरगांव, काणकोण, फोंडें म्हाला खातीर 28 जानेवारी आनी साश्ट, केंपे, सांगें ह्या म्हालां खातीर 29 जानेवारी दिसा रवींद्र भवन (ब्लॅक बॉक्स हॉल), मडगांव हांगा सकाळीं 11 वरांचेर सुरु जातली.
दरेक क्षेत्रा खातीर स्वतंत्रपणान 100 रुपया अनामत जमा केले बगर खंयच्याच बोली धारकाक पावणेंत बोली लावपाक मेळची ना. ही अनाम रक्कम 19 जानेवारी 2026 ते 27 जानेवारी 2026 ह्या कालावधीत खात्यांत जमा करपाक शकतात. ते उपरांत, संबंदीत तालुक्याची पावणी सुरू जावचे पयलीं पावणेचे सुवातेर लेगीत रक्कम स्विकारतलें.
पावणी सोंपलें उपरांत, अपेशी बोली धारकान जमा केल्ली अनाम रक्कम, तांणी भरिल्ले रकमेची मूळ पावती सादर केले उपरांत तांकां परत करतले. बोलीची पुराय रक्कम भरल्या उपरांत, 25% अण्डर प्रूफ वा ताचे परस कमी तिव्रतेच्या सोऱ्याचें सगल्यांत चड उत्पादन करपाची हमी दिवपी बोली धारकांक परवानो मंजूर करतले.
येसस्वी बोली धरकान कर शुल्क भरल्या उपरांत 5 दिसां भितर संबंदीत तालुक्याच्या अबकारी निरिक्षकांक हांड्यांचो आंकडो आनी हांड्यो लावपाची सुवात कळोवप सक्तीचें आसा. अबकारी खात्यान काजू हंगामा खातीर काजू रोसाचें मोल रु. 6.00 प्रती लिटर आनी बिंया बगर पिकिल्ल्या म्हुट्ट्याचो दर रु. 5.00 प्रती किल निश्चीत केला. तशेंच, काजूच्या सोऱ्याचो दर रु. 1000 दर जार (15 लिटर) असो निश्चित केला.
परवानो धारकान काजूचो रोस आनी डिस्टिल्ड सोरो सांठोवपा खातीर योग्य आयदनांचो वापर करचो आनी डिस्टिलेशना खातीर योग्य स्थिर यंत्रणा उबारचीं. खंयच्याच टप्प्याचेर कोळशाच्या डांबराच्या बॅरलांचो वापर जावचो न्हय, अशी सुचोवणी अबकारी खात्यान दिल्या.