भांगरभूंय | प्रतिनिधी
पणजीः एक- दोन न्हय, तर धा ते पंदरा जाणांक हांवें मोक्ष दिला अशें तो सांगता. ताचें नांव आलेक्सी लिओनोव. तो रशियेंतलो सात्तीस वर्सां पिरायेचो तरणाटो. हरमला आनी मोरजे दर्यादेगेवेल्या वाठारांनी दोन रशियन चलयांचो गळो चिरुन खून केल्ल्या प्रकरणांत ताका धरला. पूण ताचे हे कबुलीक लागून गोंय पुलिसांक धपको बसला. एका खूनाची चवकशी चालू आसतना आनीक एक खून केल्ल्याचे उजवाडाक आयलें. उपरांत ह्या रशियन नागरिकान गोंय आनी हिमाचल प्रदेशांतल्या जायत्या जाणांचो खून केल्ल्याचे सांगलें. तो खरें सांगता काय पुलिसांची दिशाभूल करता हाचो पुलीस तपास करतात. आपूण तांकां मोक्ष दिल्ल्याचो तो सांगता.
हरमल बामणभाटी एलिना कास्तानोवा हे 37 वर्सांचे रशियन चलयेचो गळो चिरुन खून केल्ल्याचें बिरेस्तारा उक्तें जालें. तपास चालू आसतनाच शुक्रारा मोरजे एलिना वानिवा हे आनीक एके 37 वर्सां पिरायेच्या रशियन चलयेची कूड मेळ्ळी. तिचोय गळो चिरुन खून जाल्लो. विशेश म्हणल्यार खून केल्ल्या दोनूय चलयांची पिराय 37 वर्सां आनी दुबावीताचीय पिराय 37 वर्सां आसा.
आपूण लोकांक ‘मोक्ष’ दितां असो दावो दुबावीत करता. ह्या दोनूय चलयांक मोक्ष दिला अशें ताणें पुलिसांक सांगलां. हिमाचल प्रदेशांतल्याय कांय जाणांक मोक्ष दिला, अशें ताणें सांगलें. पूण हे म्हायतीची पुराय चवकशी केले बगर फुडली कारवाय करचे नात अशें पुलिसांनी स्पश्ट केलां. ही म्हायती सत आसल्यार व्हड हत्याकांड प्रकरण उक्ताडार येवपाची शक्यताय आसा.
पयलीं इश्टागत मागीर खून
खून केल्ल्या मदीं दादले आनी बायलांचोय आस्पाव आशिल्ल्याचें दुबावीत पुलिसांक सांगता. पयलीं इश्टागत करतालों आनी मागीर खून करतालों आनी हीच ताची पद्दत आशिल्ल्याचे ताणें पुलिसांक सांगलां. डबल मर्डर खून प्रकरणांतल्या ह्या दोनूय चलयांचो गळो धारदार शस्त्रान चिरुन खून केलां. सध्या गोंय पुलीस चवकशी करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
