भांगरभूंय | प्रतिनिधी
माशेलः कुंभारजुवा मतदारसंघांतल्या गांवांक उदकाच्या उणावा कडेन लक्ष ओडून आमदार राजेश फळदेसाय हांणी उदका पुरवणेंत सुदारणा करपाची मागणी केल्या. परत परत फाटपुवरण करून लेगीत सांतइस्तेव्ह, करमळी, दिवाडी आनी वाशी ह्या गांवांक फावो तितली उदका पुरवण मेळना अशें तांणी सांगलें.
फळदेसाय हांणी सांगलें, आपल्या मतदारसंघांतल्या उदका पुरवण कामां खातीर 17 कोटी रुपयांची तरतूद जाल्या. उदकाचो उणाव उणो करपा खातीर टँकरांतल्यान उदकाची पुरवण करपाचे यत्न केल्यात. पूण गांवांची उदकाची गरज भागोवपाक तें फावोशेस ना. पोरण्यो पायप लायनी बदलून नवी घालप हीं जायत्या सुवातींनी कामां जाल्यात. कदंब पठार सारक्या वाठारांनी पयलेच खेपे उदक पावलां अशें तांणी सांगलें. सांतइस्तेव्ह, खोर्ली, करमळे पायप लायन बदलप गरजेचें आसा. दिवाडी आनी वांशी मेरेन उदक पावता, पूण लोकांक तें फावोशे जायना अशी म्हायती तांणी दिली.
उदका पुरवण अधिकारी आनी कर्मचाऱ्यांची बदली जाल्ल्यान निर्माण जावपी समस्यांचेरूय फळदेसाय हांणी लक्ष ओडलें. जायते फावट बदली जाले उपरांत नव्या कर्मचाऱ्यांक गरजेचो काम करपाचो अणभव आसना. अशें परिस्थितींत पोरणे कर्मचाऱ्यांक उण्यांत उणें एक म्हयनो वाडोवन कामाचीं तंत्रां आनी म्हायती शिकोवपाची वेवस्था करची अशी मागणी तांणी मंत्रीमंडळा कडेन केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
