भांगरभूंय | प्रतिनिधी
वॉशिंग्टन, खबरां संस्थाः अमेरिकेचे राष्ट्राध्यक्ष डोनाल्ड ट्रम्प हांणी ग्रीनलँडाचो आस्पाव अमेरिकेंत करपा विशीं उक्ती धमकी दिल्या. बीबीसीच्या म्हणण्या प्रमाण, ग्रीनलँड ताब्यांत घेवपाचे येवजणेक तेंको दिना जाल्यार त्या देशाचेर टॅरिफ लायतले अशें ट्रम्प हांणी सांगलें.
शुक्रारा रातीं व्हायट हावसांत जाल्ले बसकेंत ट्रम्प हांणी हें विधान केलें. पूण खंयच्या देशांक शुल्क लागू जातलें आनी ते खातीर खंयचो कायदेशीर अधिकार वापरतले हें ट्रम्प हांणी स्पश्ट करूंक ना.
अमेरिकेची ग्रीनलँड संबंदी नाटो कडेन चर्चा सुरू आसा अशें ट्रम्प हांणी सांगलां. नाटोन अमेरिकेक तेंको दिवचो. अमेरिकेचें ग्रीनलँडाचेर नियंत्रण ना जाल्यार मागीर रशिया वा चीन थंय आपलो प्रभाव वाडोवंक शकता, जो खंयचेच परिस्थितींत आमी स्वीकारचे नात अशेंय ट्रम्प हांणी म्हणलें.
गोल्डन डोम नांवाच्या व्हड संरक्षण प्रकल्पा खातीरय ट्रम्प हांणी ग्रीनलँड म्हत्वाचें अशें म्हणलां. गोल्डन डोम हो अमेरिकन क्षेपणास्त्र संरक्षण प्रकल्प. तो इझ्रायलाच्या आयर्न डोम पसून प्रेरीत आसा. चीन, रशिया ह्या सारक्या देशांच्या धोक्यांक लागून अमेरिकेची राखण करप हो गोल्डन डोमाचो हेत आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
