भांगरभूंय | प्रतिनिधी
सोलापूर/जालना, खबरां संस्था: महाराष्ट्राच्या राजकारणांत एक धक्को दिवपी घडणूक घडल्या. जंय गंभीर गुन्यांवांचे आरोप आशिल्ल्या उमेदवारांनी जनतेच्या कौलाचेर थेट जैत मेळयलां. सोलापूरांत मनसेचे फुडारी बाळासाहेब सरवदे हांच्या खून प्रकरणांतलो दुबावीत आरोपी भाजपा उमेदवार शालन शिंदे बंदखणींत आसून लेगीत वेंचून आयला. जाल्यार जालना पत्रकार गौरी लंकेश खून प्रकरणांतलो आरोपी श्रीकांत पांगारकार अपक्ष म्हणून जिखला. ह्या दोनूय निकालांक लागून राज्यांत नैतिकता, राजकी पक्ष जापसालदारकी आनी गुन्यांवकारी फाटभूंय आशिल्ल्या उमेदवारांचो प्रस्न परतून मुखार आयला. गुन्यांवकार आरोपी वेंचून आयिल्ल्यान आतां विरोधी पक्ष भाजपाचेर टिका करतात.
सोलापूर शाराच्या प्रभाग क्रमांक 2त मनसेचे फुडारी बाळासाहेब सरवदे हांच्या खून प्रकरणांक लागून पुराय राज्यांत बोवाळ जाल्लो. ह्या प्रकरणांत भाजपा उमेदवार शालन शिंदे आनी तिचे कुटुंब न्यायालयीन बंदखणीत आसात. अशें आसून लेगीत सोलापूर महानगरपालिकेचे वेंचणुकेंत शालन शिंदेन कसलोच प्रचार करिनासतना जैत मेळयलें. तिणें शिवसेना (एकनाथ शिंदे गट) उमेदवार आफ्रिन पठाण हांकां व्हड फरकान 10,767 मतांनी हारयले. ह्या जैताक लागून खूब चर्चा सुरू जाल्या.
प्रभाग 2त भाजपान शालन शिंदेक उमेदवार म्हूण जाहीर केल्लो, जाल्यार रेखा सरवदे हांचेर अर्ज फाटीं घेवपा खातीर राजकी चेंपण हाडले. हाका लागून वाद आनी झगडीं जालीं. ही झगडी सोडयतना मनसेचे फुडारी बाळासाहेब सरवदे मध्यस्थी करता आसतना शालन शिंदेच्या कुटुंबांतल्या वांगड्यांनी धारदार शस्त्रान ताचेर हल्लो करून ताका जिवेशीं मारलो. हे घडणुके उपरांत सोलापूरचें राजकारण बरेच तापलें. मनसेचे फुडारी अमित ठाकरे हांणी सोलापूरांत येवन सरवदे कुटुंबाक मेळून खर तिडक उक्तायली. पूण तरी लेगीत भाजपान शालन शिंदेक आपलो अधिकृत उमेदवार करून वेंचणूक लढयली आनी ते बंदखणींतल्यान जिखले. हाका लागून विरोधी पक्ष भाजपाचेर टिका करतात.
गौरी लंकेश खून प्रकरणांतलो आरोपीय जिखलो
जालनांत पत्रकार व सामाजिक वावुरपी गौरी लंकेश हत्या प्रकरणांतलो श्रीकांत पांगारकार महापालिका वेंचणुकेंत जैतिवंत जाला. वेंचणुके पयलीं शिवसेनान (एकनाथ शिंदे गट) जालना विधानसभा मतदारसंघाचो मुखेल म्हणून तांची नेमणूक केल्ली. पूण खर टिका जाले उपरांत ही नेमणूक रद्द जाली आनी तांकां पक्षांतल्यान भायर काडलो. तरी लेगीत तांणी अपक्ष म्हणून वेंचणूक लढयली आनी जिखलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
