भांगरभूंय | प्रतिनिधी
मुख्यमंत्री : मिठागरांक मेळटली 50 हजारांची मदत
भांगरभूंय । प्रतिनिधी
पणजी : पोदेर, नुस्तेकार, फुलकार, पाडेली, खाजेंकार हांकां वळखपत्रां दिवपा सयत आदार दिवपी येवजण सुरू जातली. राज्यांत जीं १० ते १५ मिठागरां उरल्यांत तांकां ५० हजार रुपयांची अर्थीक मजत दिवपी येवजण सुरू जातली. गोंयची अस्मिताय, वेगळेंपण सांबाळ खातीर सगल्यांनी यत्न करपाची गरज आसा, असो उलो मुख्यमंत्री डॉ. प्रमोद सावंत हांणी मारलो.
पणजे इन्स्टिट्यूट मिनेझीस ब्रागांझा सभाघरांत शुक्रारा अस्मिताय दिसाची कार्यावळ जाली. हे कार्यावळींत मुख्यमंत्री डॉ. सावंत हे मुखेल सोयरे म्हूण उलयताले. राजभास संचालनालयान हे कार्यावळीचें आयोजन केल्लें.
1947 त देश स्वतंत्र्य जालो. उपरांत 1961 त गोंय मुक्त जालें. भाशेचेर आदारीत राज्यांची निर्मिती जाली. गोंय हें कोंकणी भाशक राज्य थारलें. गोंय स्वतंत्र उरचें काय महाराष्ट्रांत विलीन जावचें हें थारोवपा खातीर जनमत कौल घेतलो. गोंयकारांनी स्वतंत्र रावपाचो कौल दिल्ल्यान गोंय वेगळें राज्य जालें. ना जाल्यार गोंय हो एक जिल्हो जातलो आशिल्लो, अशें डॉ. सावंत हांणी सांगलें. पर्यटन, साधनसुविधा तशेंच सगल्या मळाचेर गोंयांत व्हड प्रमाणांत उदरगत जाल्या. खोलाची मिरसांग, ताळगांवचीं वांयगीं हांचे सयत 15 वस्तूंक जीआय टॅग मेळ्ळा. गोंयची वळख सांबाळपा खातीर खाजें तशेंच हेर परंपरीक उत्पादनां सांबाळून दवरपाची गरज आसा. पेडण्यां आनी तिसवाडी म्हालांत मेळून 10 ते 15 मिठागरां उरल्यात. हीं मिठागरां उरलीं ना जाल्यार तीं फक्त पुस्तकांतूच वाचपाक मेळटलीं, अशें मुख्यमंत्री डॉ. प्रमोद सावंत हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
