बर्च दुर्घटणे वयल्यान गाजलो अधिवेशनाचो निमाणो दीस

भांगरभूंय | प्रतिनिधी

जमनीचेर मांडी घालून बसून विरोधकांनी काडलें प्रस्न जापेचें वर

भांगरभूंय । प्रतिनिधी

पणजी : विधानसभा अधिवेशनाचो निमाणो दीस बर्च दुर्घटणे वयल्यान बरोच गाजलो. हे दुर्घटणे वयल्यान मुख्यमंत्री डॉ. प्रमोद सावंत हांचे कडल्यान ठोस जापो आनी आस्वासनां मेळनात असो आरोप करून विरोधी आमदारांनी सभापतीच्या हौदांत धांव घेवन निशेध केलो. हातांत तकटे घेवन बोवाळ घालून प्रस्नजापेचें वर सोंपा मेरेन ते सभाघराचे जमनीर मांडी घालून बसले. उपरांत सभाघराचें कामकाज सुरळीत जालें.

बर्च दुर्घटणे विशींचो फुडें धुकलिल्लो प्रस्न शुक्रारा अधिवेशनाच्या निमण्या दिसा चर्चेक आयलो. सरकारान अधिकाऱ्यांचेर कारवाय केल्या, पूण हे दुर्घटणे विशींची राजकी जापसालदरकी निश्चीत करून आमदार आनी मंत्र्याचेर लेगीत कारवाय करची. तशेंच ह्या प्रकरणाची सीबीआय चवकशी करची, अशी मागणी विरोधी पक्ष फुडारी युरी आलेमांव हांणी केली.

हातूंत कोणाचीच राजकी जापसालदारकी ना. जो कोण ह्या प्रकरणांत घुस्पला आसत जाल्यार ताची जापासालदारकी ही निश्चीत जातली. तशेंच हो क्लब पयली सुरू कोणें केलो, थंय कोणें पयलीं बांदकाम सुरू केलें, ताका परवानगी कोणें दिली हें सगलें दंडाधिकारी चवकशेंत घालता, अशें मुख्यमंत्र्यान सांगलें.

बर्च दुर्घटणे उपरांत गोंयांत 86 आस्थापनांची तपासणी करून तातूंतल्या 22 आस्थापनांक कसलेच गरजेचे दाखले आनी परवाने नाशिल्ल्याचें दिसून आयले उपरांत ते सगले सील केल्यात. तातूंतल्या उत्तर गोंयांत 47 आस्थापनांची पळोवणी करून 17 आस्थापनांक सील मारलां जाल्यार दक्षीण गोंयांत 39 आस्थापनांची पळोवणी करून 5 आस्थापनांक सील मारलां, अशीं म्हायती मुख्यमंत्र्यान दिली.

सरकारा नायट क्लबा खातीर वेगळी परवानगी दिना. ते अबकारी खात्या कडल्यान बार अ‍ॅण्ड रेस्टॉरेंण्टाची परवानगी घेवन अतिरीक्त शुल्क भरून आस्थापन रातचीं 12 वा 4 मेरेन सुरू दवरपाची तजवीज करतात. हाचे फुडें ह्यो गजाली खपोवन घेवचे नात. कोणूय व्हीआयपी आसू, कायदो खरसाणीन पाऴटले, अशें मुख्यमंत्र्यान स्पश्ट केलें.

गोंयांत हे सारकिल्ली घडणूक पयली जावंक ना आनी हाचे फुडें जावची ना. ह्या प्रकरणांत पयल्या दिसा सावन हांव लक्ष दवरून आसा. आस्थापनाचे धनी खोसला हांकां रॅड नोटीस जारी केल्या तशेंच जे कोण जापसालदार आसात तांकांय अटक करप सुरू जालां. दंडाधिकारी चवकशेंत जीं नांवां आयल्यांत तांकां निलंबीत वा बडतर्फ केल्यात, अशी म्हायती मुख्यमंत्र्यान दिली.

मजगतीं, मुख्यमंत्री डॉ. सावंत बर्च दुर्घटणेंत नेमिल्ले दंडाधिकारी चवकशीचो अहवाल कित्याक लिपोवन दवरता. ह्या अहवालांत मंत्र्यांचीं नांवां आसात म्हूण तो लिपोवन दवरता. मुख्यमंत्र्यान हो अहवाल सभाघरांत सादर करचो, अशी मागणी बाणावलेचे आमदार वेन्झी व्हिएगश हांणी केली.

बर्च दुर्घटणेचो दंडाधिकारी चवकशी अहवाल सगळ्यांचेर आरोप निश्चीत जाले उपरांत फुडल्या विधानसभा सत्रांत सभाघरात मांडटले, अशी जाप मुख्यमंत्र्यान दिली. पूण मुख्यमंत्र्याच्यो जापो आनी आस्वासनां समाधानकारक ना म्हूण विरोधी आमदारांनी हातांत तकटे घेवन सभापतीच्या हौदांत धांव घेवन निशेध सुरू केलो. पूण सभापतीन सभाघराचें कामकाज सुरू दवरून फुडलो प्रस्न विचारलो. तेन्ना फातोड्डेंचे आमदार विजय सरदेसाय कूस मारून आपले सुवातेर गेले आनी आपलो प्रस्न मांडलो.

प्रस्नजापेचें वर काबार जाय मेरेन हेर विरोधी आमदार जमनीर मांडी घालून बशिल्ले आनी शुन्य वर सुरू जातकत ते आपले सुवातेर येवन बसले.

सीझॅडएमपींत गंभीर उणाव

दंडाधिकाऱ्याचे चवकशेंत हो क्लब मिठागर, भातशेती आनी खाजन शेतांत आयला अशें सांगता. पूण सीझॅडएमपींत 2011 त हें आस्थापन सीआरझॅडांत येना, अशें नमूद करता. ते भायर ही सुवात कुळाचे जमनींत येता. देखून कुळाचे जमनींत वेवसायीक आस्थापनाक परवानगी ना, तरी लेगीत ह्या क्लबाक गोंय प्रदुशण नियंत्रण मंडळान परवानगी कशी दिली, असो प्रस्न हळदोणेंचे आमदार कार्लुस फेरेरा हांणी उपस्थीत केलो.

फक्त वेवसाय परवानो पळोवन थंय खाजन, कुळाची सुवात आसा काय ना हाची शहानिशा करिनासतना मान्यता दिल्ल्या प्रकरणांत आमी गोंय प्रदुशण नियंत्रण मंडळाची वांगडी सचीव शर्मिला मोंतेरो हांकां निलंबीत केल्या, अशें मुख्यमंत्र्यान सांगलें.

सीझॅडएमपी तयार करपी एनसीएससीएम चैन्नय हांचे कडेन आमी स्पश्टीकरण मागलां आनी ज्या मनशान हें गुड्डुलिसांव केलां तांकां आमी सोडचे ना. 2021 सेटलमेंट आराखड्याच्या आदाराचेर आमी हो उणाव सुदारवपाक सांगला आनी सध्या हो वाठार तांत्रीक दिश्टी भायर दवरला, अशी म्हायती मुख्यमंत्र्यान दिली.

बागा न्हंये देगेक प्रत्यक्षांत 8 लाख चौ. मी. खाजन शेतां आसात. पूण सीझॅडएमपी 2011त फक्त 2 लाख चौ. मी. खाजन शेत दाखयलां. बर्च हो मिठागराचेर आयला पूण हो खाजन वाठार न्हय, अशें सीझॅडएमपींत नमूद केलां. देखून हो वाठार सीझॅडएमपींत गोठवन कसलीच उदरगत करची न्हय, अशीं मागणी विजय सरदेसाय हांणी केली. हो एक तांत्रीक विशय आसा. सध्या हो वाठार गोठवपाक सांगपाक शकना, पूण सुदारीत 2019 सीझॅडएमपींत हातूंत बदल जातलो. एका वर्सा भितर नवीन आराखडो तयार जातलो, अशें मुख्यमंत्र्यान सांगलें.