भांगरभूंय | प्रतिनिधी
हरमला आनी मोरजे चिरलो गळो
एकेच व्यक्तीचेर दोनूय खुनाचो दुबाव
दुबाविताची खून करपाची एकूच पद्दत
भांगरभूंय । प्रतिनिधी
पेडणें : रशियन पर्यटकान हरमलां आनी मोरजे दोन रशियन बायलांचो गळो चिरून खून केल्ल्याची घडणूक घडल्या. हे घडणुकेक लागून पुराय पेडणें म्हालांत भिरांतीचें वातावरण पातळ्ळां. मांद्रें पुलीस दुबाविताच्यो वेगवेगळे पद्दतीन जबान्यो घेवन ताणें आनीक खून केल्यात काय कितें हाचो सोद घेतात.
दुबाविताक एलिना नांवाचे रशियन चलये कडेन आपले मोगाचे संबंद जोडिल्ले. तिणें दुसऱ्या कडेन संबंद दवरल्यात ह्या दुबावा वयल्यान दुबावितान हो खून केला, अशी म्हायती पुलिसांक मेळ्ळ्या.
हरमला गिरकरवाड्यार एलिना कास्तानोव्हा (37) रशियन चलयेचो आलेक्सेई लिओनोव ह्या पर्यटकान गळो चिरून खून केले उपरांत मोरजे मदलोवाड्यार एलिना हे दुसरे रशियन चलयेचो तेच पद्दतीन गळो चिरून खून केलो.
हरमलच्या उत्तम नायक हाचे कागाळे वयल्यान दुबावीत अलेक्सेई लिओनोव्ह (37. रशियन नागरीक) हाचे आड गुन्यांव नं. 05.26, कलम 126 (2), 103 (1) बीएनएस दाखल केला. ताणें ताची इश्टीण एलेना कास्तानोव्हा (37. रशियन नागरीक) हिका तिच्या हरमला बिराडाक रावताली थंय हल्लो केल्ले खातीर आनी तिचे हात दोरयेन बांदून तिका चुकीचे पद्दतीन आडावन धरली, जाका लागून तिका खूब जखमो जाल्यो आनी धारेच्या शस्त्रान तिचो गळो चिरून हत्या केली. एलेना कास्तानोव्हा हिचो खून केल्ले कातीर दुबाविताक अटक केल्या.
ही घडणूक 15 जानेवारीक रातच्या 11.15 वरांच्या सुमाराक घडली. पुलिसांनी तत्काळ कारवाय करून दुबाविताक अटक केली. ह्या खून प्रकरणांत वाठारांत भंयाचें वातावरण निर्माण जालें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
