अधिवेशनाचो निमणो दीस बर्च घडणुकेवेल्यान गाजलो

भांगरभूंय | प्रतिनिधी

पणजीः विधानसभा अधिवेशनाचो निमणो दीस बर्च घडणुकेवेल्यान बरोच गाजलो. मुख्यमंत्री डॉ. प्रमोद सावंत हांचे कडल्यान ठोस जाप आनी आस्वासन मेळना असो आरोप करून विरोधी आमदारांनी सभापतीचे हौदांत धांव घेवन निशेध केलो. हातांनी तक्टे घेत बोवाळ घालून प्रस्नोत्तर वर सोंप मेरेन ते सभाघरांत मांडी घालून बसले. उपरांत सभाघराचें कामकाज सुरळीत जालें.
बर्च घडणुके विशींचो फुडे धुकलिल्लो प्रस्न शुक्रारा अधिवेशनाच्या निमाण्या दिसा चर्चेक आयलो. सरकारान अधिकार्‍यांचेर कारवाय केली. मात हे घडणुके विशींची राजकी जापसालदरकी निश्‍चीत करून आमदार आनी मंत्र्यांचेर लेगीत कारवाय करची. तशेंच ह्या प्रकरणाची सीबीआय चवकशी करची, अशी मागणी विरोधी पक्ष फुडारी युरी आलेमाव हांणी केली.
हातूंत कोणाचीच राजकी जापसालदारकी ना. जो कोण ह्या प्रकरणांत जर गुंथिल्लो आसल्यार ताचे जापसालदारकी निश्‍चीत जातली. तशेंच हो क्लब पयलीं सुरू कोणी केलो, थंयसर कोणी पयलें बांदकाम सुरू केलां, ताका परवानगी कोणी दिली हें सगळें दंडाधिकारी चवकशेंत घालतां, अशें मुख्यमंत्र्यान सांगलें.
बर्च घडणुके उपरांत राज्यांत ८६ आस्थापनांची तपासणी करुन तातूंतल्या २२ आस्थापनांक कसलेच गरजेचे दाखले आनी परवाने नाशिल्ल्याचें दिसून आयले उपरांत ते सगळे सील केल्यात, अशी म्हायती मुख्यमंत्र्यान दिली.
मजगतीं, मुख्यमंत्री डॉ. प्रमोद सावंत बर्च दुर्घटणेंत नेमिल्ले दंडाधिकारी चवकशेचो अहवाल कित्याक लिपोवन दवरता. हया अहवालात मंत्र्यांचीं नांवां आसात म्हण तो लिपोवन दवरता. मुख्यमंत्र्यान हो अहवाल सभाघरांत सादर करचो, अशी मागणी बाणावलेचे आमदार वेन्झी व्हिएगस हांणी केली.
बर्च घडणुकेचो दंडाधिकारी चवकशी अहवाल सगळ्यांचेर आरोप निश्‍चीत जाले उपरांत फुडल्या विधानसभा सत्रांत सभाघरांत मांडटले, अशी जाप मुख्यमंत्र्यान दिली.
मात मुख्यमंत्र्याच्यो जापो आनी आस्वासनां समाधानी ना म्हण विरोधी आमदारांनी हातांत तखटे घेवन सभापतींच्या हौदांत धांव घेवन निशेध सुरू केलो. मात सभापतीन सभाघराचें कामकाज सुरू दवरून फुडलो प्रस्न विचारलो. तेन्ना फातोड्डेंचे आमदार विजय सरदेसाय कूस मारून आपले सुवातेर गेले आनी आपलो प्रस्न मांडलो. प्रस्नोत्तर वर काबार जाय मेरेन हेर विरोधी आमदार जमनीर मांडी घालून बशिल्ले आनी शुन्य प्रहर सुरू जातकत ते आपले सुवातेर येवन बसले.