भांगरभूंय | प्रतिनिधी
पेडणें: हरमला एके रशियन बायलेचो काल खून जालो. गोंयचे भोंवडेर आयिल्ल्या एका रशियनाक इश्टीणीच्या चारित्र्याचेर दुबाव आयलो आनी ह्याच दुबावाच्या रागान ताणें तिचो सुर्यान गळो चिरून खून केलो. मांद्रें पुलिसांनी ह्या प्रकरणांत ऍलेक्सी लिओना (३७) हाका अटक केली. जाल्यार ताची इश्टीण इलेना कासथानोवा (३७) हिची कूड पुलिसांनी पोस्टमार्टमा खातीर गोमेकॉंत धाडल्या.
चड म्हायती प्रमाण, हो खून १५ जानेवारीक रातच्या सुमार ९.१५ वरांचेर उत्तम नायक हांच्या होम स्टेंत घडली. इश्टिणी वांगडा दुबावीत ऍलेक्सी गोंयांत आयिल्लो. हांगा आयले उपरांत तीं होम स्टेंत रावलीं. तीं रातचीं पार्ट्यो करतालीं. तशेंच गोंयभर भोंवतालीं. जिवाचो गोवा करतना इश्टीण आनीक कोणाच्या मोगांत पडिल्ल्याचो दुबाव ऍलेक्सीक आयलो. ताणें इश्टीणीक जाब विचारलो. हाचे वेल्यान वाद जालो. उपरांत ऍलेक्सीन इश्टीणीचेर सुरो घेवन पयलीं तिच्या पोटार तीन वार केले. उपरांत तिचे हात दोरयेन फाटल्यान बांदून गळ्याचेर वार केलो. तिणें बोवाळ केलो मात थंय कोणूच पावूंक ना. उपरांत तिका मरण आयलें.
हे विशीं होम स्टेचे धनी उत्तम नायक हांकां कळटांच तांणी रोखडेंच मांद्रें पुलिसांक घडणुकेची म्हायती दिली. पुलिसांनी येवन ऍलेक्सी हाका अटक केली आनी पंचनामो करून कूड पोस्टमार्टमा खातीर गोमेकॉंत धाडली. ह्या प्रकरणांत दुबाविता आड भारतीय न्याय संहितेच्या (BNS) कलम १२६(२) आनी १०३(१) खाला गुन्यांव नंबर ०५/२०२६ दाखल केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
