भांगरभूंय | प्रतिनिधी
पणजी : युनिटी मॉल प्रकल्प रद्द करपा खातीर सुरू केल्लें आंदोलन आयजूय चालूच उरतलें. कदंब पठाराचेर पयलीं भशेनूच प्रकल्पा आड ग्रामस्थांचें साखळी उपोशण चालूच उरतलें.
युनिटी मॉल प्रकल्प रद्द करपा विशीं सरकारा कडल्यान आजूनय आस्वासन मेळूंक नाशिल्ल्यान कदंब पठारार सांखळी उपोशण चालूच दवरपाचो निर्णय घेतिल्ल्याची म्हायती चिंबल जैव विविधता मंडळ समितीचे अध्यक्ष गोविंद शिरोडकार हांणी दिली.
फाटल्या कांय दिसां सावन युनिटी मॉल प्रकल्पा आड आंदोलन चालू आसा. विधानसभा अधिवेशन चालू आसतना काल आंदोलकांनी पणजे मोर्चा काडिल्लो. आंदोलक व्हड संख्येन जमिल्ल्यान पुलिसांनी कडक पुलीस बंदोबस्त तैनात केल्लो. सरकारान सभाघरांत निवेदन दिवपाक न्हयकार दिल्ल्यान ग्रामस्थ रस्त्याचेरूच बशिल्ल्यान येरादारी कोयंडी जाल्या. युनिटी मॉल रद्द करपा विशीं ठोस आस्वासन मेळूंक नाशिल्ल्यान काल रातीं उसरां मेरेन आंदोलन सुरू आशिल्लें.
मुख्यमंत्री डॉ. प्रमोद सावंत हांणी आंदोलकांची मेरशी जंक्शना लागसार रातीं उसरां भेट घेवन तांचे कडेन चर्चा केल्ली. युनिटी मॉला विशीं केंद्र सरकारा कडेन चर्चा करून निर्णय घेतले अशें तांणी सांगलें.
मात, हाचेर आंदोलकांचें समाधान जावंक नाशिल्ल्यान, सरकारा वतीन युनिटी मॉल प्रकल्प रद्द करपा विशीं आस्वासन मेळ मेरेन आंदोलन सुरू दवरपाचो निर्णय आंदोलकांनी घेतला. ते प्रमाण आयजूय पणजी कदंब पठाराचेर साखळी उपोशण चालूच उरतलें अशें गोविंद शिरोडकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
