भांगरभूंय | प्रतिनिधी
पणजी: कोंकणी भाशा मंडळान आयोजीत केल्ल्या 27 व्या गोवा युवा महोत्सवाचें उक्तावण फाल्यां, शेनवार, १७ तारखेक सकाळीं 11.45 वरांचेर मुख्यमंत्री डॉ. प्रमोद सावंत करतले.
फार्मागुडीच्या माणिकराव गावणेंकार नगरांत जावपी ह्या महोत्सवांत वेवसायीक राजेश तारकार आनी बांदोडेंचे सरपंच रामचंद्र नायक खास आमंत्रीत म्हणून हाजीर आसतले. जीव्हीएम महाविद्यालयाच्या मैदानाचेर २००० लोकांक बसपाचे तांकीचो शामियानो उबारला. ह्या महोत्सवांत 1200 सर्तक आनी 800 प्रेक्षक वांटो घेतले.
आयतारा 18 जानेवारीक सांजवेळार 5 वरांचेर जावपी समारोप सुवाळ्यांत मुखेल सोयरे म्हूण नगरसेवक विश्वनाथ (अपूर्व) दळवी हाजीर आसतले. नाटककार श्रीधर कामत बांबोळकार आनी गोंय विद्याप्रसारक मंडळाचे आमसभेचे अध्यक्ष भास्कर खंडेपारकार मानाचे सोयरे म्हूण हाजीर आसतले. बांदोडेची अंत्रुज घुडयो संस्था आनी गोंय विद्याप्रसारक मंडळ फोंडा हे महोत्सवाचे सह- आयोजक आसात.
को. भा. मंडळ अध्यक्ष रत्नमाला दिवकार, येवकार अध्यक्ष नरेंद्र सावयकार, गोंय विद्याप्रसारक मंडळाचे अध्यक्ष कृष्ण शेट्ये, महोत्सवाचे कार्याध्यक्ष पुरुषोत्तम वेर्लेकार, मुखेल संयोजक तानाजी गावडे, अंत्रुज घुड्योची अध्यक्ष सुविधा नायक आनी हेर कार्यकर्ते महोत्सवाच्या येसस्वी आयोजना खातीर दिसरात वावरत आसात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
