भांगरभूंय | प्रतिनिधी
मुख्यमंत्री : सगल्या गोंयकारांच्या नांवाचेर जातलें घर
भांगरभूंय । प्रतिनिधी
पणजी : कांय पंचायतींनी अजून मेरेन कोयर एकठांय करपाक सुरवात करूंक ना. त्या पंचायतींचेर कारवाय जातली. तांचो निधी बंद करपाचो लेगीत विचार जातलो, अशें मुख्यमंत्री डॉ. प्रमोद सावंत हांणी सांगलें. बर्च दुर्घटणेंत दोशी आशिल्ल्यांचेर खर कारवाय जातील. कोणूच दोशी सुटचो ना, अशें आस्वासन तांणी दिलें. घर नांवार करपी ‘म्हजें घर’ येवजणेक जांणी आव्हान दिलां, तांकां पयशें कोण दितात हें लोकांक कळपाची गरज आसा, अशें मुख्यमंत्री डॉ. प्रमोद सावंत हांणी सांगलें. ‘म्हजें घर’ येवजणे खाला सगल्या गोंयकारांच्या नांवाचेर घर जातलें, अशें मुख्यमंत्री डॉ. सावंत हांणी स्पश्ट केलें.
राज्यपालांच्या अभिभाशणाचेर जाल्ले चर्चेक मुख्यमंत्र्यांनी बिरेस्तारा जाप दिली. अभिभाशणा खातीर राज्यपालांक परबीं दितना मुख्यमंत्र्यांनी सरकाराचे कामगिरीचो नियाळ घेतलो.
सरकारच्यो सगल्यो येवजण्यो तशेंच तिसऱ्या जिल्ह्याचो नियाळ राज्यपालांनी अभिभाशणांत मांडला. कल्याणकारी येवजण्यांचो लाव चडांत चड लोकां मेरेन पावोवपा खातीर कुशावती ह्या तिसऱ्या जिल्ह्याची निर्मिती जाल्या. कुशावती जिल्ह्यांत 26 टक्यां परस चड अनुसूचीत जमातीचे (एसटी) लोक आसात. तिसरो जिल्हो स्थापन करपा खातीर सरकारान केंद्रा कडेन निधीची मागणी केल्या. केंद्राच्यो ज्यो येवजण्यो आसात, तातूंतल्या 80 टक्के येवजण्यांची 100 टक्के कार्यवाही जाल्या.
गोरवां चिकित्सा म्हाविद्यालय सुरू करपाची प्रक्रिया सुरू आसून फुडल्या वर्सा विद्यार्थ्यांक प्रवेश दिवप सुरू जातलें. खूब तेंपा उपरांत सरकारान सीझॅडएमपी 2011 (दर्यादेग वाठार वेवस्थापन आराखडो) निश्चीत जाला. सीझॅडएमपी 2019 तयार करपाची प्रक्रिया निमाण्या पावंड्यार आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
