भांगरभूंय | प्रतिनिधी
गोंय शालेय शिक्षण कायदो दुरुस्ती विधेयकाक मान्यताय
भांगरभूंय । प्रतिनिधी
पणजी : 1 जून मेरेन ज्या भुरग्याक 6 वर्सां पुराय जातात, ताकाच यत्ता पयलेंत प्रवेश दिवपाची तजवीज करपी गोंय शालेय शिक्षण कायदो दुरुस्ती विधेयक सभाघरांत संमत जालें. शिक्षणमंत्री ह्या नात्यान मुख्यमंत्री डॉ. प्रमोद सावंत हांणी हें विधेयक चर्चेक घेवन संमत केलें.
सभाघरांत मंगळारा गोंय शालेय शिक्षण दुरुस्ती विधेयक सादर जाल्लें. नवें शिक्षण धोरण आनी राष्ट्रीय शिक्षण धोरणाचे कार्यवाही खातीर ही दुरुस्ती करपाचो सरकाराचो प्रस्ताव आसा. अंदूं 2025- 2026 वर्सा 1 जूनाक साडेपांच वर्सां पुराय केल्या भुरग्याक प्रवेश दिला. हाचे फुडें मात 6 वर्सां सकयल्या भुरग्याक प्रवेश मेळचो ना.
पंचायत राज दुरुस्ती विधेयक संमत
आमदार तशेंच जिल्हो पंचायत वांगड्याक आपल्या मतदारसंघांत येवपी ग्रामसभेंत वांटो घेवपाची संद मेळटली. हाचे खातीर पंचायत राज कायद्यांत नवें कलम 4 एचो आस्पाव करपी विधेयकाक मान्यताय दिली.
तशेंच बांदकाम दुरुस्ती, नव्या बांदकामाक पंचायत सचिवांनी परवाने 15 दिसांच्या जाग्यार 7 दिसांत दिवचे म्हूण कलम 47 मदीं दुरुस्ती जाली. हे विशीं जारी केल्या अध्यादेशाक मान्यताय घेवपा खातीर ही दुरुस्ती आसा. पंचायत मंत्री मॉवीन गुदिन्हो हांणी विधेयक विचारांत घेवन तें संमत केलें.
मुंडकार दुरुस्ती विधेयक 27 आड 6 मतानी संमत
मुंडकाराचे मान्यताये बगर घर दुसऱ्याच्या नांवार भाटकाराक करपाक मेळचें ना. तशेंच घर आशिल्ली जमीन मुंडकाराचे मान्यताये बगर विकपाक, लिजार दिवपाक भाटकाराक मेळची ना. हाचे खातीर मुंडकार कायद्याच्या कलम 9 मदीं दुरुस्ती करपी विधेयकाक विरोधी आमदारांनी विरोध केलो. हें विधेयक 27 आड 6 मतांनी संमत जालें. महसूल मंत्री बाबूश मोन्सेरात हांणी विधेयक चर्चेक घेवन संमत केलें. जे मेरेन न्यायालयांत मुंडकाराचो खटलो चालू आसता, ते मेरेन तो मुंडकार अशें सिद्ध जायना. हाका लागून भाटकार ताची मान्यताय कित्याक घेतलो, असो मुद्दो आमदार कार्लुस फेरेरा हांणी मांडलो. काँग्रेस, आप, गोवा फॉरवर्ड आनी आरजीन विधेयकाक विरोध केलो.
भूंय महसूल संहिता दुरुस्ती विधेयक संमत
हे भायर भूंय महसूल संहिता दुरुस्ती विधेयक सभाघरांत संमत जालें. ह्या विधेयकांत रुपांतरणाची सनद 60 दिसांच्या जाग्यार 45 दिसां भितर दिवप बंधनकारक आसा. हे विशीं सरकारान हाचे पयली अध्यादेश जारी केल्लो. आतां कायद्यांत दुरुस्ती करपा खातीर विधेयक संमत केलां.
सभाघरांत संमत जाल्लीं हेर विधेयकां
– गोवा इन्स्टिट्यूट ऑफ मॅनेजमेंट खासगी विद्यापीठ विधेयक
– गोंय वॅट दुरुस्ती विधेयक – गोंय शेती उत्पादन, पशूपालन वेपार दुरुस्ती विधेयक
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
