भांगरभूंय | प्रतिनिधी
तुयें हॉस्पिटल आंदोलनांत लक्ष्मीकांत पार्सेकार हांचें आव्हान
पेडणें : तुयें हॉस्पिटल हें आमी लिंक हॉस्पिटल म्हणून उबारिल्लें. तशे तरेचो लेखी करार नासल्यार वा सरकाराचे शंभर कोटी आमी अशेच खर्च केल्या जायत, जाल्यार सरकारान आपल्याचेर खटलो घालचो, अशी मागणी आदले मुख्यमंत्री प्राचार्य लक्ष्मीकांत पार्सेकार हांणी केली. तुयें हॉस्पिटल कृती समितीन आयोजीत केल्ल्या साखळी उपोशणांत पांचव्या दिसा वाटेकार जाले तेन्ना ते उलयताले.
तुयें हॉस्पिटल हें बांबोळी हॉस्पिटलाक लिंक जावचें अशी एकूच मागणी मुखार दवरून तुयें हॉस्पिटल कृती समितीन साखळी उपोशण करीत आंदोलन सुरू केलें. पांचव्या दिसा लक्ष्मीकांत पार्सेकार हाजीर रावन आंदोलनाक आपलें पुराय फाटबळ जाहीर केलें. तेन्ना नवेच जिल्लो पंचायत वांगडी राधिका उदय पालयेंकार, मांद्रेंचे आदले सरपंच तशेंच आतांचे पंच बाळा उर्फ प्रशांत नायक, आदले जिल्लो पंचायत वांगडी रंगनाथ कळशांवकार, मांद्रेचे आदले सरपंच तशेंच आतांचे पंच ऍड. अमित सावंत, तुयेंचे आदले सरपंच निलेश कांदोळकार, पंच उदय मांद्रेंकार, पार्सेचे आदले सरपंच देवेंद्र प्रभुदेसाय, तुळशीदास रावत, आम आदमी पक्षाची सुवर्णा हरमलकार, गोवा फॉरवर्डचे दीपक कलंगुटकार, पेडणें तालुका विकास ऍड. जितेंद्र गांवकार, प्रणव परब, निमंत्रक व्यंकटेश नायक, पेडणें नागरीक समितीचे निमंत्रक ऍड. सदानंद वायंगणकार, निलेश पटेकार, संतोष शेटगांवकार, राजू नरसे, ‘मिशन फॉर लोकल’चे राजन कोरगांवकार, आदले उपनगराध्यक्ष गजानन सावळ देसाय, तुयें हॉस्पिटल कृती समितीचे निमंत्रक जुझे लोबो, जगन्नाथ देसाय, देवेंद्र परब, प्रदीप परब आनी खुबश्या जाणांनी फाटबळ दिलें.
प्राचार्य लक्ष्मीकांत पार्सेकार हांणी, तुयें हॉस्पिटल आनी ताका सगल्यो सोयी सुविधा उपलब्ध जावच्यो; ते नदरेंतल्यान हें हॉस्पिटल उबारिल्लें. दोन वर्सांच्या कार्यकाळांत इमारत पुराय जाली. मात ताचे उपरांतच्या वेंचून आयिल्ल्या आमदारांनी ह्या हॉस्पिटला विशीं कसलीच कार्यवाही करूंक नाशिल्ल्यान हो प्रकल्प आडकून उरिल्ल्याचो दावो केलो.
हें हॉस्पिटल लिंक करपा विशीं लेखी नाशिल्लें. खाजन गुंडो बांधार इव्हेंट करतात. ते लेखी स्वरूपांत आशिल्ले काय? असो प्रस्न आसले मुख्यमंत्री प्राचार्य लक्ष्मीकांत पार्सेकार हांणी हाजीर केलो. हॉस्पिटल उबारतना सगले तरेचे करार नियमितपणान पुराय केले. मान्यताय मेळयिल्ल्याचें तांणी म्हणलें.
सीएचसी हॉस्पिटल हें २५ खाटींचें आसपाक शकतात. १०० खाटींचें आसपाक शकना. १०० खाटींचें हॉस्पिटल गोमेकॉक लिंक करपा खातीर उबारिल्ल्याचें तांणी स्पश्ट केलें. व्हडा संख्येन आंदोलनांत वाटेकार जावपाचो उलो तांणी मारलो.
मांद्रेंचे आदले सरपंच तशेंच आतांचे पंच वांगडी ऍड. अमित सावंत, हरमल जिल्लो पंचायत वांगडी राधिका पालयेंकार, आदले सरपंच तशेंच पंच प्रशांत उर्फ बाळा नायक, गोवा फॉरवर्डचे उत्तर गोंय अध्यक्ष दीपक कलंगुटकार, कॉंग्रेसीचे ऍड. जितेंद्र गांवकार, प्रणव परब, राजू नरसे, ‘मिशन फॉर लोकल’चे राजन कोरगांवकार हांणी आंदोलनाक पुरायेन फाटबळ दिवन तुयें हॉस्पिटल बांबोळे हॉस्पिटलाक लिंक करपाची मागणी केली. तशेंच आंदोलन कर करपाची शिटकावणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
