भांगरभूंय | प्रतिनिधी
पणजी: १५ जानेवारी २०२६ चिंबलच्या प्रस्तावीत ’युनिटी मॉल’ आनी ’प्रशासन स्तंभ’ ह्या प्रकल्पां आड सुरू आशिल्ल्या जनआंदोलनाक चिड्डुवपाक पुलिसांनी आयज तांत्रीक शस्त्राचो वापर केल्ल्याचो प्रकार मुखार आयला.
विधानसभेचेर काडिल्ल्या महामोर्चाचें लायव्ह आडावपा खातीर गोंय पुलिसांनी ’सिग्नल जॅमर’चो वापर केल्ल्यान प्रसार माध्यमांचे प्रतिनिधी आनी आंदोलक तिडकले.
आयज सकाळीं १०:३० च्या सुमारास शेकड्यांनी आंदोलक अटल सेतू आनी मांडवी पुला लागसार एकठांय आयिल्ले. ह्या इतिहासीक आंदोलनाचें ’लायव्ह’ प्रक्षेपण करपा खातीर सगल्या चॅनलांचे प्रतिनिधी सज्ज आशिल्ले. मात, अचकीत सगल्या पत्रकारांच्या मोबायलाचें सिग्नल गायब जालें आनी इंटरनेट सेवा ठप्प जाली. सुरवातेक तांत्रीक इबाड आसतलो अशें दिसलें, मात पुलिसांच्या ताफ्यांत ’सिग्नल जॅमर’ बसयिल्ली गाडी आशिल्ल्याचें समजतांच पत्रकारांनी पुलिसांक धारेर धरले.
म्हायती पावोवपा खातीर आमकां आडावप हो लोकशायगच्या चवथ्या स्तंभार केल्लो हल्लो, तुमकां म्हायतीचें प्रसारण आडावपाचो अधिकार कोणी दिलो? अशा शब्दांत पत्रकारांनी जाब विचारलो. पत्रकार आक्रमक जावन पुलीस अधिकार्यांक घेराव घालो आनी हो प्रकार सरळ जनते मुखार मांडपाची शिटकावणी दिले उपरांत, निमाणें पुलिशेक नमतें घेवचें पडलें आनी जॅमर काडले. हाचे उपरांतूच आंदोलनाचें दृश्य जनते मेरेन पावपाक शकलें.
विधानसभेंत मागणी
दुसरे कडेन विरोधी पक्ष फुडारी युरी आलेमाव हांणी आयज विधानसभेंत मागणी केली, सरकारान लोकांचे भावनेचो विचार करून ह्या आदेशाक उच्च न्यायालयांत आव्हान दिवचें न्हय आनी प्रकल्प कायमचो रद्द करचो. जाल्यार, मुख्यमंत्री डॉ. प्रमोद सावंत हांणी म्हायती दितना सांगलें, तांणी उत्तर गोंय जिल्लो आनी सत्र न्यायालयाचो आदेश वाचलो, ताचेर कायदेशीर सल्लो घेतात. आमी न्यायालयाच्या आदेशाचो आदर करतात, मात ह्या निर्णयाक आव्हान दिवचें काय ना, हें कायदेशीर सल्लागार थारायतले, अशें मुख्यमंत्र्यांनी स्पश्ट केलें. विधानसभेंत चर्चा सुरू आसतना मांडवी पुलार आंदोलक आनी पुलिसां मदीं शाब्दीक बोवाळ जालो. पुलिसांनी आंदोलकांक विधानसभे कडेन वचपा पसून आडावपाक सगले रस्ते बंद केल्यात. जाल्यार जॅमर लावन वा बडयांचो वाप करून आमचो आवाज चेंपूंक शकना, असो निर्धार आंदोलकांनी उक्तायलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
