भांगरभूंय | प्रतिनिधी
म्हादयचेर उदका स्त्रोत मंत्री सुभाष शिरोडकार हांची लेखी जाप
पणजीः म्हादय प्रकरणांत महाराष्ट्र राज्य प्रतिवादी आसा. देखून सरन्यायाधीश हे महाराष्ट्र राज्यातले आशिल्ल्या कारणान म्हादयचो विशय सुनावणे खातीर तांचे मुखार येवंक ना, अशें रजांव उदका स्त्रोत मंत्री सुभाष शिरोडकार हांणी लेखी जापेंत दिलां.
विधानसभेच्या पटलार लेखी जाप दितना शिरोडकार हांणी सांगलें, सरन्यायाधीश हांच्या फुडारपणा खाला खंडपिठांत म्हादयचें प्रकरण सद्या प्रलंबीत आशिल्ल्या कारणान म्हादयच्या विशयाचेर सुनावणी खातीर निश्चीत तारीख थारावपा खातीर फाटल्या णव म्हयन्यांत वेगळी याचिका राज्य सरकारान दाखल करूंक ना. सुनावणेची यादी, वेळापत्रक आनी पद्दत थारावपाचे विशेश अधिकार हे सरन्यायाधीश हांचे आसतात. 20 जानेवारी 2025 सावन सुरू जावपी सप्तकांत निदेश दिवपा खातीर हें प्रकरण परतून सुचीबध्द करपाचे आदेश 13 नोव्हेंबर 2024 दिसा दिल्ले. तेप्रमाण तारीख लेगीत निश्चीत जाल्ली. पूण प्रकरण सुचीबध्द आसून लेगीत न्यायालय हेर सुचीबध्द प्रकरणांत व्यस्त आशिल्ल्या कारणान म्हादयचे प्रकरण सुनावणे खातीर घेवपाक मेळूंक ना.
उपरांत न्या. बी आर गवई हांणी 14 मे 2025 दिसा सरन्यायाधीश पदाचो ताबो घेतलो. पूण गवई हे महाराष्ट्राचे आशिल्ल्या कारणान हें प्रकरण घेवपाक मेळूंक ना. कारण महाराष्ट्र राज्य ह्या प्रकरणांत प्रतिवादी आसा.
ते भायर म्हादय देगणांतले 7.6 टीएमसी उदक मलप्रभा देगणांत घुंवडावपा खातीर केंद्र सरकारान दिल्लो तात्वीक दाखलो रद्द करपाचे निदेश दिवपा खातीर आनी म्हादयक निगडीत राज्याक म्हादयचे उदका संदर्भात वैधानीक निवाडो दिवपा खातीर आंतरराज्य न्हंय उदक वाद कायदो 1956 खाला उदका वाद लवाद स्थापन करपा खाचीर गोंय राज्यान सर्वोच्च न्यायालयांत अर्ज दाखल केल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
