भांगरभूंय | प्रतिनिधी
उत्तर गोंय प्रधान जिल्लो आनी सत्र न्यायालयाचो निर्णय
पणजी: चिंबलच्या इतिहासीक आनी पर्यावरणीय नदरेन संवेदनशील सुवातेर उबारपी प्रस्तावीत ‘युनिटी मॉल’ प्रकल्पाक उत्तर गोंय प्रधान जिल्लो आनी सत्र न्यायालयान आयज प्रकल्पाचो बांदकाम परवानो रद्द केला. तशेंच ह्या प्रकल्पाक समर्थन करपी पंचायत उपसंचालक आनी गटविकास अधिकारी हांचे सगले आदेशूय रद्द केल्यात.
ह्या प्रकल्पावेल्यान चिंबला फाटल्या कांय दिसां सावन ताणाचें वातावरण आशिल्लें. कालूच थळावे पंच शंकर नायक हांकां थळाव्यांचे तिडकीक तोंड दिवचें पडलें. नायक हांणी युनिटी मॉलाच्या समर्थनार्थ एक व्हिडिओ काडून सोशल मीडियाचेर प्रसारीत केल्ल्यान थळावे नागरीक तिडकल्ले. तशेंच काल तांकां बडोवपाचोय यत्न जाल्लो. हाका लागून ह्या वाठारांत पुलिसांचो खर बंदोबस्त तैनात करचो पडिल्लो.
चिंबलच्या ईतिहासीक ‘तोयार’ तळें आनी पाणथळ सुवातेच्या संरक्षणा खातीर ग्रामस्थांनी २८ डिसेंबर सावन बेमुदत उपोशण सुरू केल्लें. सत्र न्यायालयान ६ डिसेंबराक ह्या प्रकल्पाच्या कामाक स्थगिती दिवन ८ जानेवारी २०२६ मेरेन ‘जैसे थे’ परिस्थिती राखपाचे आदेश दिल्ले. मात, जिल्लो पंचायत वेंचणुकेचो निकाल लागतांच न्यायालयाचे आदेश मोडून झुजां पांवड्यार बांदकाम सुरू केल्ल्याचो आरोप ग्रामस्थांनी केल्लो. न्यायालयाचो अवमान आनी पर्यावरणाचो जावपी विध्वंस हाका लागून हें आंदोलन आनीक खर जालें.
ईतिहासीक फाटभूंय आशिल्लें तोयार तळें चिंबलाचें सैमीक दायज. १९०८ त पणजी शाराक उदक नाशिल्लें, तेन्ना ह्याच तळ्यांतल्यान उदकाची पुरवण केल्ली. अशें हें इतिहासीक दायज नश्ट करून थंय मॉल उबारपाक ग्रामसभेन तीन फावटीं थाराव घेवन विरोध केल्लो. मात, प्रशासकीय यंत्रणांनी नेम कुशीक दवरून २४ वरांनी परवानग्यो दिल्ल्याचो दावो याचिकाकर्त्यांनी केल्लो, जो न्यायालयान आयज सगले आदेश रद्द करतना ग्राह्य धरलो. जो मेरेन जीटीडीसी ह्या प्रकल्पाचें काम पुरायेन थारायना, तो मेरेन फाटीं सरचे ना, असो निर्धार आंदोलकांनी उक्तायला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
