भांगरभूंय | प्रतिनिधी
पणजी : गोंयच्या सरकारी, कोमुनिदाद जमनीचेर ह्यान फुडें अतिक्रमण, बेकायदेशीर बांधकामां करपाक दिवचे ना. खंयसरूय सरकारी, कोमुनिदादचे जमनीर अतिक्रमण जात अशें दिसल्यार संबंदीत खात्यांनी बेगोबेग खर कारवाय करची, असो आदेश महसूल खात्यान जारी केला. जिल्लोधिकार्यांनी दरेका म्हालांत उपजिल्लोधिकार्यांचे अध्यक्षते खाला भरारी पंगड तयार करचे. शेनवार, आयतार सुटयेच्या दिसांनीय हे पंगड कार्यरत रावतले. अतिक्रमणांच्यो कागाळी घेवपा खातीर वॉट्सऍप क्रमांकूय जारी करचो, अशें आदेशांत नमूद केलां. ह्यान फुडें सरकारी, कोमुनिदाद जमनीचेर अतिक्रमण, बेकायदेशीर बांधकामां उबारल्यार संबंदीत अधिकार्यांक कारवायेक तोंड दिवचें पडटलें.
भरारी पंगडांत उपजिल्लोधिकारी, तालुका मामलेदार, तालुका गट विकास अधिकारी, नगरपालिका वाठारांतले नगरपालिका निरीक्षक, पंचायत सचीव, तलाठी, गोंय दर्यादेग विभाग वेवस्थापनाचो एक प्रतिनिधी, एक पुलीस प्रतिनिधी हाचो आसपाव आसतलो. ह्या पंगडांत आनीक कोणाक घेवचो, हाचो निर्णय जिल्लोधिकार्यांक घेवपाचो आसा.
खंयचेय तरेन सरकारी, कोमुनिदाद जमनीचेर अतिक्रमण करून नवीं बेकायदेशीर बांदकामां उबीं उरचीं नात; हाची खबरदारी संबंदीत यंत्रणांनी घेवची; असो महसूल खात्यान जारी केल्ल्या ह्या आदेशांत म्हणलां.
सरकारान ‘म्हजें घर’ येवजणे खाला घरां कायदेशीर करून दिवपाचो निर्णय घेतला आनी खंयचीं आनी केन्ना मेरेनचीं घरां कायदेशीर करचीं, हे विशीं मार्गदर्शक तत्वां स्पश्ट केलीं. तशेंच ह्यान फुडें सरकारी, कोमुनिदाद जमिनींचेर कसलेच तरेचीं अतिक्रमण, बेकायदेशीर बांधकामां जावचीं ना हाची जापसालदारी आतां संबंदीत सरकारी खात्यांचेर आसतली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
