भांगरभूंय | प्रतिनिधी
पणजी : बर्च क्लबाक उजो लागून २५ जाणांक मरण आयलें. हे घडणुकेच्या चवकशी अहवालाचो अभिभाशणांत उल्लेख ना. हो अहवाल सरकार उक्तो करिना, वा ताचेर सभाघरांत चर्चा लेगीत कित्याक जाय ना? असो प्रस्न आमदार वेंझी व्हिएगस हांणी केलो. राज्यपालांच्या अभिभाशणावेले चर्चेंत ते उलयताले. गोंय वाटावपा खातीर निवृत्त न्यायाधीश फेर्दीन रिबेलो हांणी मागण्यांचें निवेदन सरकाराक दिलां. हे विशीं लेगीत अभिभाशणांत उल्लेख ना, अशें सांंगीत आमदार वेंझी व्हिएगस हांंणी अभिभाशणाचेर टिका केली. विकसीत गोंय करपाचें उद्दिश्ट आसलें तरी तें कशें करतले हे विशींचो कसलोच उल्लेख अभिभाशणांत ना. नगरनियोजन कायद्याच्या कलम १७ (२) आनी ३९ (ए)च्या आदारान शेतांं तशेंच जमनीचें रूपांंतरण सुरूच आसा. उजो लागिल्ल्या बर्च बाय रोमीओ लेन हो क्लब लेगीत बेकायदो जमीन रूपांतरण करून बांदिल्ल्याचें आतां स्पश्ट जालां. जमनीच्या रूपांतरणाविशीं कसलोच उल्लेख राज्यपालांच्या अभिभाशणांत ना. राज्यांत नोकर्यां खातीर पयशे दिवपी जॉब स्कॅम उक्ताडार आयलें. कर्मचारी भरती आयोगा वरवीं जाता ते भरतीची सगळे जाण तोखणाय करीत आसले. तरणाट्यां मदीं विस्वास निर्माण करपा खातीर सरकार किदें करता? तें राज्यपालांनी अभिभाशणात सांगूंक ना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
