भांगरभूंय | प्रतिनिधी
पणजी : राज्यांत विवीध प्रकल्प, बांदकामां खातीर झाडां कापलीं. मात नवीं झाडां लावन रानां तयार करपाचें तशेंच उरिल्ल्याचें दिसता. ४.८५ लाख झाडां लावपाचें काम आजूनय प्रलंबीत आसा.
झाडां कापपाचे नेम खर करतना आतां उडयिल्ल्या झाडांचे सुवातेर ताचे परस चड झाडां लावपाचे निर्देश गोंय वृक्ष प्राधिकरणान दिल्यात. प्राधिकरणाची मुखेल सचिवांच्या अध्यक्षते खाला हालींच बसका जाली. तातूंत कापिल्लीं झाडां आनी लायिल्लीं झाडां हांचो नियाळ घेतलो. हातूंत वयली गजाल दिसून आयली.
थळाव्यांच्या विरोधाक लागून सध्या वादग्रस्त थारिल्ल्या चिंबल युनिटी मॉला खातीर ९७ झाडां उडोवपाची परवानगी दिल्या. जाल्यार २९१ रोपे लावपाची अट घाल्या. थिये एमआयटी युनिव्हर्सिटी खातीर ५३५ झाडां कापपाची मंजुरी दिली. जाल्यार त्या बदल्यांत १६०५ झाडां लावपाची अट घाल्या. फर्मागुडयेर छ. शिवाजी महाराज संग्रहालया खातीर १९५ झाडां उडोवपाक परवानगी दितना ५८५ लावपाची अट घाल्या. ह्यान पयलीं प्रकल्पां खातीर कापिल्लीं ४.८५ लाख झाडां लावपाचें काम प्रलंबीत आसात. झाडांचे सुवातेर परत झाडां लावन रानां परतून फुलोवपाचे निर्देश प्राधिकरणान दिल्यात. फाटल्या वर्सा १६ ऑक्टोबर, २०२५ क उच्च न्यायालयान दिल्ल्या मार्गदर्शक तत्वांक धरून हे निर्देश दिल्यात.
सरकारी प्रकल्प, खाजगी प्रकल्प आसूं वा खंयच्याय कारणान झाडां कापल्यार ताचे परस तिपेटीन झाडां लावपाची अट रान खात्यान परवानगी दितना घालची. उपरांत झाडां लायलीं काय ना तें पळोवपाची जापसालदारकी रान खात्या कडेन दिली. झाडां लावपा वांगडा ५ वर्सां मेरेन तांचो सांबाळ करपाची अट घाल्या. ३५ ए कायद्या खाला झाडां खातीर सुरक्षा हमी म्हणून संरक्षण निधीय जमा करून घेवपाचे निर्देश दिल्यात. झाडां लावन ५ वर्सां मेरेन ताचो सांबाळ केल्यार तो निधी परत करचो; ना जाल्यार निधी तसोच दवरून झाडांचो साबाळ करपाचे निर्देश गोवा वृक्ष प्राधिकरणान दिल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
