भांगरभूंय | प्रतिनिधी
अधिवेशनाचो तिसरो दीस सत्ताधारी आनी विरोधकां मदल्या खर संघर्शांत गाजलो
पणजी: गोंय विधानसभेच्या शिंयाळ्या अधिवेशनाचो तिसरो दीस सत्ताधारी आनी विरोधकां मदल्या खर संघर्शांत गाजलो. आम आदमी पक्षाचे आमदार व्हेंझी व्हिएगस हांणी राष्ट्रीय स्वयंसेवक संघ (आरएसएस) आनी ‘वंदे मातरम’ हे घोशणेचो संदर्भ दिवन केल्ल्या विधानाक लागून सभाघरांत बरोच बोवाळ जालो. व्हिएगस हांच्या विधानाचेर मुख्यमंत्री डॉ. प्रमोद सावंत हांणी सामको खर आक्षेप घेतिल्ल्यान सत्ताधारी आनी विरोधी आमदारां मदीं शाब्दीक बोवाळ जालो. हाका लागून सभाघराचें काम कांय काळा खातीर विस्कळिल्लें.
काल सभाघरांत जाल्ले हे चर्चे मजगतीं मुख्यमंत्री सावंत हांणी स्पश्ट करतना म्हणलें, राष्ट्रीय स्वयंसेवक संघाचे स्वयंसेवक ‘वंदे मातरम’ म्हणिनात, असो दावो करपाचो अधिकार आमदार व्हेंझी हांकां ना. ह्या विधानाक लागून सभाघरांतलें वातावरण तापिल्लें. सभापतींनी हस्तक्षेप करीत सगल्या वांगड्यांक सभाघराची शिस्त पाळपाचो उलो मारलो. मात दोनूय वटेन आपापली भुमिका लावन धरिल्ल्यान ताण कायम आशिल्लो.
हे प्रकरण आयज सकाळींय बरेंच तापलें. शिंयाळ्या अधिवेशनाच्या तिसर्या दिसाय विधानसभा संकुलांत दाखल जाले उपरांत मुख्यमंत्र्यांनी पत्रकारां कडेन संवाद सादलो. ह्या वेळार तांणी आमदार व्हेंझी हांचेर टिका करतना म्हणलें, भारत घडोवपाक आनी राष्ट्र निर्माणांत राष्ट्रीय स्वयंसेवक संघाचें योगदान सामकें व्हड. व्हेंझी हांकां इतिहास खबर ना जाल्यार तांणी इतिहासाची म्हायती घेवची.
दुसरे कडेन वास्कोचे आमदार दाजी साळकार हांणीय ह्या विधानाचो निषेध केलो. व्हेंझी व्हिएगस हांणी केल्लें विधान सामकें दुर्दैवी आशिल्ल्यान, कितेंय उलोवंचे पयलीं तांणी संघाच्या कार्याची आनी योगदानाची म्हायती घेवपाक जाय आशिल्ली, अशें साळकार हांणी नमूद केलें. ह्या वादाक लागून अधिवेशनांतलें राजकी वातावरण आनीक तापिल्ल्यान येवपी कामांतूय हें जाणवतलें अशी शक्यताय उक्तायल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
