भांगरभूंय | प्रतिनिधी
मुख्यमंत्रीः वंदे मातरमाचो मंत्र दिवंक नाशिल्ल्यान काश्मीरी समस्या वाडली
पदाचो राजकी वापर जावपाक जायना
पणजी : आयच्या नवनिर्मिती आनी तंत्रज्ञानाच्या काळांत फुडें वचपा खातीर वंदे मातरम उर्बा दिवपी आसा. स्वातंत्र्या उपरांंतच्या फुडल्या 50 वर्सांत सरकाराक वंदे मातरमाचो विसर पडलो. वंदे मातरमाचो मंत्र दिवंक नाशिल्ल्या कारणान नक्षलवादी कारवायो वाडपा सयत काश्मीराची समस्या वाडत गेली अशें मुख्यमंत्री डॉ. प्रमोद सावंत हांणी सांगलें.
सभाघरांत मंगळारा वंदे मातरमाक 150 वर्सा पुराय जावपा खातीर चर्चा जाली. हे चर्चेक जाप दितना मुख्यमंत्र्यांनी वयलें उलोवप केलें.
मजगतीं, वंदे मातरमाचे चर्चेंत वांटो घेतना आमदार वेंझी व्हिएगश हांंणी आरएसएसा विशीं केल्लें उलोवप मुख्यमंत्र्यां सयत सत्ताधारी आमदारांनी हरकत घेतली. हाका लागून सभाघरांतलें वातावरण तापलें. वेंझी व्हिएगशाचें उलोवप कामकाजांतल्यान काडून उडयले उपरांत चर्चा मुखार सुरू जाली.
देशाक स्वातंत्र्य मेळोवन दिवपा खातीर बर्याच सुटके झुझार्यांनी आपलें बलिदान दिलें. मोहन रानडे, जगन्नाथराव जोशी हे राष्ट्रीय स्वयंसेवक संघाचे वावुरपी गोंयचे सुटके खातीर वावुरल्यात. वंदे मातरम ह्या पदाचो राजकी वापर जावपाक जायना. भारतीय जनता पक्षाच्या सरकारा खातीर देशहीत पयले सुवातेर आसा अशें मुख्यमंत्र्यांनी सांगलें.
बर्चाचो चवकशी अहवाल
उक्तो करचो : युरी आलेमांव
वंदे मातरम हें पद एका राजकी पक्षाचें वा एके विचारसणीच्या मालकीचे ना. तें पुराय देशाचें आनी सगल्या विचारसरणीक जोडपी पद आसा. आयज संविधान धोक्यांत आसा. संविधान वाटावपाची गरज आसा. तरणाट्यांक आयज नोकऱ्यांची गरज आसा. स्वातंत्र्याच्या काळांत सगल्यांक संद उपलब्द जावपाक जाय. वंदे मातरम ह्या पदाक मान दिवपा खातीर आयज लोकांचो आवाज आयकुपाची गरज आसा. गोंंयांत आयज लोक सुरक्षीत नात. बर्च क्लबाक उजो लागून 25 जाणांक मरण आयलें. हे विशींचो चवकशी अहवाल सरकारान उक्तो करपाची गरज आसा अशी मागणी युरी आलेमांव हांंणी केली.
सरकार गोंय विधानसभेंत ‘वंदे मातरामा’चेर चर्चा करता. पूण गोंयाक भेकडावपी म्हादय आनी हेर प्रस्नांचेर चर्चा कित्याक करिना? असो प्रस्न युरी आलेमांव हांणी केलो.
वंंदे मातरम हें फक्त पद न्हयतर ती आमची आवय आसा. वंंदे मातरम पदान सुटके झुझाऱ्या सयत सगल्या नागरिकांंक उर्बा दिल्या. वंंदे मातरम पदांत जमीन, न्हंंयो आनी सैमाचो आस्पाव आसा. ह्या पदांत देशाची अस्मिताय आसा. ह्या पदांतल्यान उर्बा घेवन आमी सगल्यांनी शेतां, सैम, न्हंयो वाटावपा खातीर वावर करपाक जाय अशें आमदार विरेश बोरकार हांंणी सांंगलें.
वंदे मातरम पदान सुटके झुजाऱ्यां सयत देशाच्या सगल्या लोकांंक उर्बा दिल्या. हें पद म्हणल्यार देशाची वळख, मान आनी अस्मिताय जावन आसा. वंदे मातरम पदाक 150 वर्सां जाली त्या 7 नोव्हेंबर 2025 दिसा ह्या पदाचें सगल्याक गायन जालें. सरकारी कार्यालयां सयत शाळा, विद्यालयांनी पदाचे सामुहीक गायन जालें. हे निमतान ह्या पदाचो भोवमान जालो, अशें आमदार देविया राणे हांंणी म्हणलें.
वंदे मातरम हें पद हो भारतमातेचो आत्माे आसा. देशातलीं शेतां, न्हंयो तशेंच विविधतायेचें वर्णन ह्या पदांत आसा. आमचो भारत देश कसो आसा, तें ह्या पदांतल्यान कळटा. जेन्ना, जेन्ना सुटके झुजारी वा सैन्या मदीं निरशेवणी येता, तेन्ना हें पद म्हणले उपरांत उपरान धीर मेळटा अशें रोहन खंवटे हांंणी म्हणलें.
बंकीमचंद्र चटर्जी हांंच्या ह्या पदाक 1950 वर्सां राष्ट्रीय गीत म्हूण मान्यताय मेळ्ळी. हें पद शाळा, विद्यालयांनी सप्तक वा पंदरा दिसातल्यान एकदां तरी म्हणपाची गरज आसा, अशें आमदार निलेश काब्राल हांंणी सांंगलें.
वंदे मातरम हें पद व्हडल्यान म्हणपाची गरज ना, मात काळजांतल्यान म्हणपाची गरज आसा. आमची भूंय, धर्म, एकचार हांंकां मान दिवपाचो संदेश वंदे मातरम पद दिता अशें आमदार मायकल लोबो हांणी सांंगलें.
ह्या वेळार आमदार वेंझी व्हिएगश, वीज मंत्री सुदिन ढवळीकार, कला आनी संस्कृती मंत्री रमेश तवडकार, समाज कल्याण मंत्री सुभाष फळदेसाय, आमदार विजय सरदेसाय हांंचींय उलोवपां जालीं.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
