भांगरभूंय | प्रतिनिधी
चिंतन – 97
“एका बोटाची निशाणी ।
परीपाक नाहीं मनीं ॥
तरिं तें संपादिलें सोंग ।
कारणावांचूनियां व्यंग ॥
तुकाराम महाराजाच्या ह्या ओळींत एक सादो, पूण चुरको लावपी संदेश आसा —
कपलाक एका बोटान लायिल्लो गंध पळोवन आमी ताका वैष्णव म्हणटात. पूण ताचें मन शुद्ध ना जाल्यार मागीर ताणें कारण नासतना वैष्णवाचो भेस घेतला अशें म्हणचें पडटलें. भायली अस्मिताय, भायलें रूप, भायली गजाल हांणी कोणूच ‘धार्मिक’ वा ‘बरो’ थारना. मन शुद्ध आसल्यारूच सुगंधाक अर्थ आसता. नाजाल्यार तो फक्त सोंग.
म्हाका खबर आशिल्ल्या एका कुटुंबांत आरतीची सुरवात दर दिसा सकाळीं व्हडा भक्तीभावान जाताली. घांट, शंख, धूप- सगलें परिपूर्ण आशिल्लें! पूण त्या घरांत सदांच वायट उलोवप, आरोप, तिडक, ताण… भुरगीं भियेंतालीं. व्हडले किरकिरे आशिल्ले.
एक दीस त्या घरांतले ल्हान चलयेनूच आवयक विचारलें, “आवय, देवळांत दिवो पेट्टा… पूण तुज्या मनांत कित्याक ना?”
हो प्रस्नूच तिका हालोव गेलो. मागीर तिका कळ्ळें- गंध कपलाचेर आसा, पूण मनांत शांती ना. भक्तीची सुरवात भायल्या कर्मांतल्यान न्हय तर भितरल्या वृत्तींतल्यान सुरू जाता.
आयज हजारांनी लोक सोशल मिडियाचेर धर्मीक पोस्ट शेअर करतना दिसतात. जयजयकाराचे स्टेटस, मंत्रांचे रील, देवळाच्या यात्रांचे फोटो… पूण तांच्या कमेंटांनी मात राग, गाळी, आनी दुस्वासाचीं उतरां.
म्हाका याद आसा एका इश्टान सांगिल्ली एक गजाल- ताणें शांतपणान धर्मीक रीलाक वेगळें मत दिलें आनी ताचे मुखार आशिल्ल्या मनशान ताचो सरळ अपमान केलो.
ताणें म्हणलें, “आरे गंध तुज्या कपलाचेर आसा… पूण मनांतलो राग ताचे परस व्हडलो दिसता!”
तुकाराम महाराजय तेंच सांगतात- भक्ती फकत दाखोवपा खातीर आसूंक फावना. मन पयलीं शांत आसूंक जाय.
हाचे उरफाटें गांवांतली एक जाण्टी आजी याद जाता. कपलाचेर गंध ना, माळ ना, व्हडल्योव्हडल्यो पुजा नात. पूण कोणाच्याय घरांत दुख्ख आसलें जाल्यार ती पयली धांवताली. उपाशी लोकांक जेवण दिवप, रडपी मनशाचो हात धरप, भुरग्यांच्या अभ्यासांत आदार करप- हीं तिचीं दिसपट्टीं कामां.
कपला वयल्या गंधान भक्ती सिद्ध जायना. तो फकत अभिनय थारता.
खरो बदल भितरल्यान जाय- उलोवपांत गोडसाण, सभावांत शांती, कृतींत मोग आनी मनांत नमळाय. भक्ती म्हणल्यार मनाची लागवड, सुगंध हें दृश्य फळ.
हो तुकोबाचो संदेश- भायल्या चिन्नांपरस मनाची शुद्धताय व्हड.
– ह भ प देवदत्त दिगंबर परुळेकर
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
