भांगरभूंय | प्रतिनिधी
पणजीः बर्च घडणुकेवेल्यान सभाघरांत दुसरे दिसाय बोवाळ जालो. विशय न्यायप्रविश्ठ आशिल्ल्याचें सांगून सरकार जाप दिवपाक टाळटा असो आरोप जावन मुख्यमंत्री आनी विरोधकां मदीं उतरांचें गेर्र्र पेटलें. उपरांत हे विशीं शुक्रारा चर्चा आपयतले अशें मुख्यमंत्री डॉ. प्रमोद सावंत हांणी सांगलें.
शियांळ्या अधिवेशनाचो दुसरो दीस बोवाळांत सुरू जालो. सुरवेक एक बर्च घडणुके विशीं मंगळारा चर्चेक येवपी तारांकीत प्रस्नाची जाप मुख्यमंत्र्यान फुडें धुकलिल्ले कारणान विरोधकांनी बोवाळ घातलो.
बर्च घडणुके विशीं उलोवपाक मुख्यमंत्री कित्याक भियेता असो प्रस्न विरोधी पक्ष फुडारी युरी आलेमाव हांणी केलो. ह्या प्रस्नाचे जापेक फक्त अतिरिक्त म्हायती दिवपा खातीर फुडें धुकल्ला. शुक्रारा हो प्रस्न चर्चेक येतलो, अशी जाप मुख्यमंत्र्यान दिली.
जेन्ना आयज्या कामकाजांत प्रस्न वळेरेंत येता तेन्ना तो प्रस्न खंयच्या कायद्या प्रमाण फुडें धुकल्ला? असो प्रस्न विजय सरदेसाय हांणी केलो.
हे विशीं जाप दितना मुख्यमंत्र्यान सांगलें, बर्च घडणुके विशींच्या प्रस्नाची जाप अपडेट करपा खातीर कलम ४९(२) खाला प्रस्न मुखार धुकल्ला. आमकां खंयसरूच कांयच लिपोवन दवरपाचें ना. हाची जाप शुक्रारा सकाळीं दितले. हो प्रस्न सगल्यांत पयलीं सकाळीं ११.३० वरांचेर येतलो आनी ह्या प्रस्नाक सारकी स्पश्ट जाप दितलों, अशें मुख्यमंत्र्यान सांगलें.
अभिभाशणांत बर्च घडणुकेचो विशयावेल्यान ना म्हण विरोधकांनी पयलींच बोवाळ घालपाक सुरवात केली. अभिभाशणांत क्र.२०२ भितर हडफड्यां जाल्ले घडणुकेची स्पश्ट नोंद केल्या. मात विरोधकांनी पयलींच बोवाळ करून ते भायर सरले. जी कितें घडणूक घडल्या ती अभिभाशणांत मांडल्या. पयल्या दिसा भशेन विरोधकांक असोच बोवाळ घालपाक जाय, अशें मुख्यमंत्र्यान म्हणलें.
मात कलम ३७(१५) सकयल गुप्तता दवरपाचें कारण सांगून हो प्रस्न फुडें धुकल्ला. मात मीठागरांत लायिल्ल्या क्लबांत २५ जाण मेले हातूंत गुपीत कांयच ना, असो आरोप सरदेसाय हांणी केल्ल्या कारणा मुख्यमंत्री आनी सरदेसाय हांचे मदीं मदी उतरांचें घेर्र पेटलें. विजय हे भलत्याच प्रस्नाचो संदर्भ बर्चाच्या प्रस्नाक लायता. बर्चाचो फुडें धुकलिल्लो प्रस्न आमी शुक्रारा पयलो घेतले, अशें मुख्यमंत्र्यान सांगलें.
मंत्रीमंडळ विशीं जाप दिवंक नाशिल्ल्यान युरी तापले
मंत्रीमंडळ बसका आनी पोस्ट फॅक्टो मान्यताय विशींच्या अतारांकीत प्रस्नाक कलम ३१(१५) सकयल गुप्ततेचो विशय सांगून हाची जापूच दिवंक ना. हातूंत सरकार कितें लिपोवपाक सोदता? ह्यान पयलीं २०२४त सरकारान मंत्रीमडळा विशीं सगल्या प्रस्नाक जापो दिल्यात आनी आतांच मंत्रीमंडळ बसकेंत कितें गुप्त आसा. विधिमंडळ सचीव सभाघराची दिशाभूल करता, असो आरोप विरोधी पक्ष फुडारी युरी आलेमाव हांणी केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
